«Ոստիկանության աշխատակցից սկսած՝ վերջացրած հարկային տեսուչով, աշխատանքից հետո, տուն գնալիս, տաքսու նշանը դնում էին մեքենայի վրա, ասում`մի քիչ էլ փող աշխատենք` նոր գնանք տուն»,-խոսելով տաքսի ծառայությունների նոր եւ նախկին օրենքից, այսօր «Հենարան» ակումբում, ասաց «Հայաստանի տաքսի ծառայությունների գործատուների ճյուղային միության» նախագահ Վահագն Սահակյանը:
Պարոն Սահակյանը, նշելով տաքսի ծառայությունների գործունեության նոր օրենքը, թվարկեց օրենքի բացերը. «Միայն փաստաթղթերին նայելով հատկացնելու են լիցենզիա, որը ես անընդունելի եմ համարում: Ամենապարզ օրինակը` եթե այդ մեքենայի մոտ ղեկի դասավորությունն աջակողմյան է, այն նախատեսված չէ մեզ մոտ երթեւեկության համար, այդ մեքենաներին, ընդհանարապես, չի կարելի լիցենզիա հատկացնել: Իսկ այսօր փաստաթղթերից չի երեւում ղեկը որ կողմն է դրված»:
Տաքսիների լիցենզավորման նոր պայմաններով վարորդները հանրապետության ամենահեռավոր մարզերից, նույնիսկ, պետք է գան Երեւան հաշվիչները ստուգաչափելու: Վահագն Սահակյանի խոսքերով, Ստանդարտների պետական ինստիտուտը եւ չափագիտության ազգային ինստիտուտը չունեն շրջաններում ստորաբաժանումներ. «Հաշվիչը ստուգաչափելու համար, երբ որ ստուգաչափման պայմանները այդքան հեշտացրել են, գյուղական վայրերում լիցենզիա հանելու համար դարձնելով 5 հազար դրամ, այդ մեքենաներին մենք ստիպենք Մեղրիից գան հասնեն Երեւան, որպեսզի 2 հազար դրամանոց ստուգաչափում անցնի, իհարկե, սա աբսուրդ է, սա չի նշանակում հեշտացնել պայմանները»:
Վահագն Սահակյանի խոսքի մանրամասները` տեսանյութում
«Բռավո+» տաքսի ծառայության սեփականատեր Լյովա Ավետիսյանը կարծում է, որ նոր օրենքը ավելի շատ անհատ տաքսիստների շահերից է բխում, քանի որ այն պայմանները, որոնք ստեղծել են անհատ տաքսիստների` լիցենզիա ստանալու համար, անհամեմատ ավելի լավ պայմաններ է առաջարկում, քան` տաքսի ծառայությունների համար, ինչը կհանգեցնի տաքսի ծառայությունների լուծարմանը:
Ըստ Լյովա Ավետիսյանի, ծառայությունը յուրաքանչյուր ավտոմեքենայի համար ամսեկան պետք է վճարի 30 հազար դրամ, անհատ վարորդը` 12 հազար դրամ. «Սա նշանակում է, որ տաքսի ծառայությունները վարորդի խնդիր կունենան, քանի որ վարորդները կնախընտրեն անհատ աշխատել: Իսկ ծառայությունը կկանգնի խնդրի առաջ. կամ աշխատողներ կկորցնի, կամ` կլուծարվի:
Վահագն Սահակյանն ասաց, որ բազմիցս դիմել են տաքսիների աշխատանքը համակարգող մարմիններին`ընդհանուր գին, գոնե, մայրաքաղաքում սահմանելու համար. «Պետք է բոլոր մեքենաները ծառայություն մատուցեն նույն գնով: Եվրոպայում տաքսու տարիֆները նույնն են, միասնական գին կա եւ բոլոր վարորդները առաջնորդվում են այդ գնով: Պետք է, ի սկզբանե, հաշվիչները ծրագրավորված լինեն նույն տարիֆով»:
Լուսինե ԲՈՒԴԱՂՅԱՆ
