«Մեր պատվիրակության դիրքորոշումը ուղղորդված չէր որեւէ մեկի կողմից: Դա քվեարկություն էր, որը բխում էր այդ պահին ստեղծված իրավիճակից»,- Aravot.am-ի հարցին` ինչո՞վ բացատրել ԵԽԽՎ-ում հայաստանյան պատվիրակության «ձեռնպահ» քվեարկությունը ՌԴ պատվիրակությանը ձայներից զրկելու հարցում եւ արդյոք մեր պատվիրակների քվեարկությունն ուղղորդվում էր ՀՀ ԱԳՆ-ից, ասաց ԵԽԽՎ հայաստանյան պատվիրակության ղեկավար Հերմինե Նաղդալյանն` այսօր կայացած մամուլի ասուլիսում:
«ՌԴ-ն մեր ստրատեգիական դաշնակիցն է և մենք երբեք կողմ չենք եղել նրա վերաբերյալ բացասական որոշումներին, մանավանդ, որ խոսքը գնում է խորհրդարանական պատվիրակությանը: Խնդիրը նրանում է, որ տեղում, երբ նայում ես իրավիճակը, տեսնում ես, որ մեր քվեարկությունը, մեր փոքրաթիվ պատվիրակության քվեարկությունը, էական ազդեցություն չէր ունենալու հիմնական թվերի վրա»,- ասաց Հերմինե Նաղդալյանը:
Հարցին` ռուս պատվիրակները իրավիճակային քվեարկության հետ կապված զրույց ունեցե՞լ են, Հերմինե Նաղդալյանն ասաց, որ ռուս պատվիրակներն այդ քվեարկությունից անմիջապես հետո լքել են դահլիճը:
«Հորդորում եմ, մեր քվեարկության մեջ չորոնել այն, ինչը որ չկա: Մենք որեւէ խնդիր չենք ունեցել ՌԴ պատվիրակության, ՌԴ ժողովրդի հետ»,- հավելեց նա:
Կարդացեք նաև
Պատվիրակության ՀՀԿ-ական անդամ Արփինե Հովհաննիսյանն էլ պարզաբանեց, որ ինքն այդ օրը առողջական խնդիրներ է ունեցել եւ վեհաժողովը լքել է ավելի վաղ`չմասնակցելով նաեւ այլ քվեարկությունների:
Նելլի ԳՐԻԳՈՐՅԱՆ
