Այսօր, խորհրդարանի նիստի ժամանակ, ԲՀԿ խմբակցության քարտուղար Նաիրա Զոհրաբյանը եռյակի կողմից առաջարկեց ԱԺ նախագահի մոտ խորհրդակցություն անցկացնել` կառավարության ներկայացուցիչների մասնակցությամբ, եւ կարգավորել «Շրջանառության հարկի մասին» նախագծի շուրջ առաջացած աղմուկը: ԱԺ նախագահը մերժեց եռյակի առաջարկը: Սակայն, ավելի ուշ, ինչպես արդեն տեղեկացրել ենք, անակնկալ խորհրդարան եկավ ՀՀ վարչապետ Հովիկ Աբրահամյանը:
ԱԺ նախագահի մոտ խորհրդակցության ավարտից հետո «Ժառանգություն» խմբակցության ղեկավար Ռուբեն Հակոբյանը լրագրողների հետ զրույցում ասաց` ողջամտությունը հաղթեց, և հրավիրվեց խորհրդակցություն ԱԺ նախագահի մոտ, որտեղ և հաջողվեց ընդհանուր եզրեր գտնել: «Որոշվեց, որ հաջորդ քառօրյայում քննարկման է դրվելու այս հարցը, իսկ այսօրվա արտահերթ նիստը հետաձգվում է մինչև հաջորդ քառօրյա: Մոտեցումների միջև բավական ընդհանրություններ կան, և մենք գտնում ենք, որ կարող ենք այդ ընդհանուր մոտեցումներով ներկայանալ հաջորդ քառօրյային: Մենք նաև ընդգծեցինք, որ եթե հաջորդ քառօրյային ընդհանուր մոտեցումներ չձևավորվեն, ապա կրկին նախաձեռնելու ենք արտահերթ նիստ»,- ասաց Ռուբեն Հակոբյանը:
Հիշեցնենք գլխավոր-վիճելի հարցն այն է, որ փաստաթղթավորումը լինի ոչ թե պարտադիր, այլ կամավորսկզբունքով:
Կարդացեք նաև
Լրագրողների հարցին, չկա՞ մտավախություն, որ կառավարությունը կրկին կփորձի փափուկ բարձ դնել օրենսդիրների գլխի տակ, Ռուբեն Հակոբյանը պատասխանեց. «Կա դրական մոտեցում ու պայմանավորվածություն, թե նախնական գնահատականով ինչպես են պատկերացնում հարց լուծելը: Շատ ճիշտ եք, տառապանքի փորձով,միշտ երբ փորձել ենք համաձայնության գալ, ստացվել է, որ փափուկ բարձ են դրել, բայց ժամկետը ֆիքսված է»:
ԲՀԿ խմբակցության քարտուղար Նաիրա Զոհրաբյանն էլ ասաց, որ իր գնահատմամբ, մինչև հուլիսի մեկը կասեցնել օրենքի գործողությունը, ընդամենը ժամանակ է ձգում և որևէ կերպ չի կարգավորում խնդիրը։ «Ուստի այսօր քննարկման ժամանակ մենք առաջարկեցինք շատ կարճ ժամկետում, այն է՝ մինչև հաջորդ քառօրյա: Իսկ չորս քաղաքական ուժերն ունեն արդեն պատրաստի նախագիծ, ինչ կերպ ենք տեսնում հարցի կարգավորումը, որը քննարկել էլ ենք փոքր ու միջին ձեռնարկատերերի հետ: Մենք մեր սկզբունքները չենք զիջելու: Կգա՞նք կոմպրոմիսի, շատ լավ, չենք գա կոմպրոմիսի, հաջորդ քառօրյային արտահերթ նիստ հրավիրելու նախաձեռնությունը մեր հիմնավորումներով մնում է ուժի մեջ»։
«Անում ենք ամեն ինչ, որ ժողովրդի համար լավ լինի»,- լրագրողներին ասել է վարչապետ Հովիկ Աբրահամյանն ու նստել մեքենան`չպատասխանելով այլ հարցերի:
Նելլի ԳՐԻԳՈՐՅԱՆ