Այս պահին ԱԺ-ում Վերահսկիչ պալատի շատ սպասված 2013-ի հաշվետվությունն է ներկայացվում: Պատգամավորները սպասում էին, որ հաշվետվությունը պետք է ներկայացնի Իշխան Զաքարյանը, սակայն ՎՊ-ից ներկայացել էր խորհրդի անդամ Սեյրան Ավագյանը:
ՀԱԿ խմբակցության ղեկավար Լեւոն Զուրաբյանը բողոքեց. «2012-ի սկանդալային բացահայտումներից հետո Իշխան Զաքարյանն այլեւս ԱԺ չի գալիս: Մեզ ասում եք, թե ՎՊ նախագահն արձակուրդում է: Մենք բոլոր հիմքերն ունենք կասկածելու, որ Իշխան Զաքարյանին ուղղակի արգելված է ԱԺ գալ, շփվել պատգամավորների հետ, գործունեությունը ներկայացնել: Այս հաշվետվությունը պետք է ներկայացներ Իշխան Զաքարյանը: Ի ՞նչ է կատարվել նրա հետ, միգուցե, միգուցե նախագահն արգելել է նրան ելույթ ունենալ այս դահլիճում: Սեյրան Ավագյանն իրավունք չունի ներկայացնելու ՎՊ հաշվետվությունը»:
Հետո Լեւոն Զուրաբյանը, դիմելով Սեյրան Ավագյանին, հայտարարեց. «Դուք խախտում եք օրենքը, իրավունք չունեք դա անելու: Խնդրում ենք ձեզ հեռանալ այստեղից»:
Նրան արձագանքեց ԱԺ նախագահ Գալուստ Սահակյանը. «Ես համաձայն չեմ, որ կարծիքները ճշմարտության տեղ ներկայացնեք այստեղ: Իշխան Զաքարյանը, ինչպես ցանկացած չինովնիկ, իրավունք ունի արձակուրդ ունենալու: Նա չպետք է իմանար, որ ԱԺ-ն ինչպիսի օրակարգ ունի, որ գնար արձակուրդ կամ չգնար»:
Կարդացեք նաև
Պատգամավորները պահանջում էին՝ ո՞ւր է Իշխան Զաքարյանը, թող գա բացատրի մեզ, բացատրի, թե ինչու չի կարող գալ:
«Անցյալ տարի պիտի անեինք, այսքան որ հետաձգել ենք, մի քիչ էլ կհետաձգենք: Ես 6 հարց էի պատրաստել, բայց չեմ տա, որովհետեւ չեմ ուզում մասնակցել այս ապօրինությանը»,- ասաց Լեւոն Զուրաբյանը:
ՀԱԿ խմբակցության պատգամավոր Գագիկ Ջհանգիրյանի խոսքերով՝ «Սահմանադրությամբ ասվում է, որ հաշվետվություն ԱԺ-ում ներկայացվում են ԱԺ կանոնակարգ օրենքի հիման վրա: Կանոնակարգով ասում է, որ հաշվետվությամբ հանդես է գալիս ՎՊ նախագահը: Եթե մենք չենք հարգում մեր իսկ կողմից ընդունած օրենքը, ինչո՞ւ պետք է դրանց հետեւեն այլ պաշտոնատար անձինք, շարքային քաղաքացիները: Պետք է Իշխան Զաքարյանը ներկայացներ, թե 2012-ի հաշվետվության արդյունքները, որ մենք ուղարկել էինք իրավապահներին, ովքեր ինչ հոդվածներով են դատապարտվել, ինչ են արել: Հիմա Սեյրան Ավագյանին մենք այդ հարցը ո՞նց ուղղենք»:
Գալուստ Սահակյանը հակադարձեց. «Այնպես չի, որ մարդը հարգելի բացակայում է, նա պիտի փոխարինող չունենա, դրա համար իրենք ուղարկել են իրենց փոխարինողին: Այնպես չի, որ Սեյրան Ավագյանը չի կարող ձեր հարցերին պատասխանել: Այնպես չի, որ չի եկել, որովհետեւ ինչ-որ մի բանից վախեցել է: Պարոն Ջհանգիրյան, ես կարծում եմ, որ կարելի է մտածել, որ լավ կլիներ Իշխան Զաքարյանը լիներ, բայց ունենք այն, ինչ ունենք»:
Սեյրան Ավագյանն էլ իր հերթին բացատրեց, թե ինչու չի եկել Իշխան Զաքարյանը. «Բարձր պաշտոնատար անձ է, ունի աշխատանքային գրաֆիկ, ներկայացնում է ՎՊ-ն աշխարհի տարբեր երկրներում, նրա բացակայությանը պետք է վերաբերվել հարգալից»:
Թեւան Պողոսյանը կոչ արեց Գալուստ Սահակյանին մշակույթ փոխել, տեղի տալ եւ հետաձգել հաշվետվությունը՝ պատմության մեջ մնալու համար՝ իր այդ որոշմամբ: Գալուստ Սահակյանը տեղի չտվեց՝ պատասխանելով, որ չի ուզում պատմության մեջ մնալ, ԱԺ-ն թող մնա պատմության մեջ:
Հռիփսիմե ՋԵԲԵՋՅԱՆ
