Արարատյան հայրապետական թեմի (ԱՀԹ) երիտասարդները, Հայոց ցեղասպանության 100-րդ տարելիցին ընդառաջ, յուրաքանչյուր ամսվա 24-ին տարբեր միջոցառումներ (բանախոսություններ, քննարկումներ և այլն) են իրականացնում՝ նվիրված Ցեղասպանության զոհերի հիշատակին:
Թեմի երիտասարդներն այսպիսի ինը միջոցառում են կազմակերպել արդեն, իսկ 10-րդի մեկնարկը կտրվի այսօր:
Փետրվարի 24-ին ԱՀԹ երիտասարդական կառույցները հանդես կգան «Չորս» անունը կրող նախագծով, որը սոցցանցերում կտարածվի #4demand պիտակով:
Ինչպես այսօր լրագրողների հետ հանդիպման ժամանակ տեղեկացրեց ԱՀԹ երիտասարդական կառույցների համակարգող տեր Պետրոս ավագ քահանա Մալյանը, այս նախագծի շրջանակներում կնկարահանվեն հոլովակներ, որոնց միջոցով կներկայացվեն չորս սերունդների՝ պատանիների, երիտասարդների, հասուն և ծեր մարդկանց դիրքորոշումը Հայոց ցեղասպանության դատապարտման վերաբերյալ:
Կարդացեք նաև
«Այդ հոլովակներով յուրաքանչյուր հայ սեփական հոլովակը նկարելու (ցանկացած տեսանկարահանող սարքով) և այն սոցցանցերում տարածելու միջոցով պիտի ներկայացնի մեր ազգային պահանջը: Տեսագրվող պահանջի տևողությունը չպետք է գերազանցի մեկ րոպեն: Ի դեպ, հոլովակներ կարող են նկարահանվել նաև այլ լեզուներով»,- տեղեկացրեց քահանան:
«4 սերունդը հավիտենության խորհուրդն է,- հստակեցրեց «Ազգային առաջնորդության ինստիտուտ» ՀԿ-ի ֆիլմերի ծրագրերի պատասխանատու Նինա Խաչատրյանը,- նախագծով երիտասարդները նպատակ ունեն աշխարհի 4 կողմերում տարվա 4 եղանակին բարձրաձայնել 4 սերնդի 4 հիմնական պահանջը՝ հիշել, ճանաչել, դատապարտել և հատուցել: Հոլովակների միջոցով հայերը պիտի աշխարհին հիշեցնեն, որ պայքարը չի դադարելու մինչև պահանջին համապատասխան լուծում չգտնվի»:
ԱՀԹ երիտասարդական միությունների ատենապետ Վահան Մարդյանի խոսքով՝ ծրագիրը նպատակ ունի հնարավորինս շատ հնչեցնելու «Հիշում եմ և պահանջում» կարգախոսը:
«Մենք այսօր կտեղադրենք չորս հոլովակներ և հույս ունենք, որ դրանք տարածում կգտնեն: Մեզ կարող են միանալ բոլոր ցանկացողները: Մեր նպատակն է, որ յուրաքանչյուր մարդու մասնակից դարձնենք Ցեղասպանության պահանջին»,- հավելեց նա:
Տեղեկացնենք, որ նախագծի մեկնարկը կազդարարվի այսօր երեկոյան՝ Արարատյան հայրապետական թեմի առաջնորդարանում: Այնուհետև հոլովակները հասանելի կդառնան համացանցում (Արարատյան հայրապետական թեմի պաշտոնական կայքում, Ազգային առաջնորդության ինստիտուտի կայքում, թեմի ու երիտասարդների ֆեյսբուքյան էջերում):
Սիրանուշ ՀԱՅՐԱՊԵՏՅԱՆ
