Գազի, էլեկտրաէներգիայի օր օրի բարձրացող սակագները մարդկանց ստիպում են ձմռան ցրտին խնայողություններով օգտագործել հոսանքը կամ գազը: Էներգակիրների աճող գները ցածր եկամուտ ունեցող ընտանիքների համար նվազեցնելու նպատակով բազմաբնակարան շենքերի արդյունավետության բարձրացման ծրագիր է մշակվել: Այս մասին այսօր «Կոնգրես» հյուրանոցում կազմակերպված քննարկման ժամանակ ասաց Հայաստանում բազմաբնակարան շենքերի էներգաարդյունավետության բարձրացման ծրագրի ղեկավար Կարեն Ասատրյանը: Ըստ նրա, որոշ համայնքներում արդեն մի քանի շենքեր ջերմամեկուսացվել են, ինչի արդյունքում բնակիչների` ջեռուցման համար վճարած գումարները գրեթե կիսով չափ նվազել են: Այս տարի նախատեսվում է ջերմամեկուսացնել եւս 7 շենք:
Շենքերի մի մասը ջերմամեկուսացվել է վարկով, որոշներն էլ` շենքի վրա տեղադրված, բջջային օպերատորներին կամ այլ ընկերություններին պատկանող ալեհավաքներից ստացվող գումարներով:
Կարեն Ասատրյանը նշում է, որ այս ծրագիրն իրականացնելիս խոչընդոտներից մեկն այն է լինում, որ բանկը երաշխավոր է ուզում, բացի այդ բնակիչները չեն վստահում բանկին, համատիրությանը, վերջինս էլ` բնակիչներին. «Բանկը համատիրության հետ աշխատելու փորձ չունի, hամատիրությունն էլ գույք չունի, որ բանկի համար երաշխիք լինի, համատիրությունը չի ուզում վարկ վերցնել, այն էլ` դոլարով»:
Կարեն Ասատրյանի խոսքերով, այս ծրագրին աջակցում է նաեւ Երեւանի քաղաքապետարանը, որը համաֆինանսավորում է:
Կարդացեք նաև
Կարեն Ասատրյանի խոսքերով, հենց աշխատանքները իրականացվում են եւ արդյունքը տեսնում են, բնակիչների տրամադրվածությունը «180 աստիճանով» փոխվում է եւ մարդիկ սկսում են համատիրությանը պարտաճանաչ վճարել այդ ծրագրով ծախսված գումարների դիմաց: Ծրագրի ղեկավարի համոզմամբ` ավելի շատ շենքեր կարող են ջերմամեկուսացնել, եթե վարկային պայմանները բարելավվեն:
Լուսինե ԲՈՒԴԱՂՅԱՆ
