Դիմահարդարման միջոցները հայտնի են վաղ ժամանակներից: Դրանից օգտվում էին հատկապես Հին Եգիպտոսում եւ Հին Հռոմում: Հռոմեական հայտնի պատրիկուհիները հոնքերը ներկել են մրջյունի ածխացած ձվիկներով, իսկ շրթունքները՝ կարմրադեղով կամ կապարի խառնուրդով: Մեր օրերում շպարանյութեր ընտրելիս առաջինը հաշվի է առնվում նրա բնական ծագումը, որպեսզի մաշկը գեղեցկացնելու փոխարեն՝ ավելի չվնասվի:
Դիմահարդարմամբ կարելի է քողարկել դեմքի թերությունները, ընդգծել առավելությունները՝ երեւալով ավելի երիտասարդ ու առողջ:
Անցել են այն ժամանակները, երբ դեմքը պետք է լավ սպիտակ երեւար, հիմա, մաշկի գույնին համապատասխան՝ ընտրում են մեկ կամ մի քանի տոն մուգ դիմափոշի ու տոնային քսուք, որից առաջ նախապես քսվում է սնուցող քսուք: Պետք է հիշել, որ այն, ինչը ուզում եք դեմքի վրա քողարկել, ավելի մուգ տոնային քսուք քսեք, իսկ այն, ինչը որ ցանկանում եք ընդգծել` օգտագործեք համեմատաբար բաց տոնի դիմափոշի: Դիմահարդարման մեջ շրթներկը դեմքի ամբողջության մի մաս է կազմում եւ պետք է համապատասխան լինի մաշկի, մազերի եւ հագուստի գույնին: Շրթներկի ընտրության հարցում պետք է հաշվի առնել նաեւ տարիքը, մազի գույնը: Շիկահեր, բաց գույնի մազերով կանանց խորհուրդ է տրվում օգտագործել բաց եւ մուգ վարդագույն շրթներկ, իսկ մուգ մաշկ ունեցող թխահերներին՝ մուգ կարմիր, բալի գույն կամ շագանակագույն շրթներկ, որը երանգավորում եւ ընդգծում է շրթունքները: Բերանն ավելի գեղեցիկ է լինում, երբ վերեւի շուրթը ստորին շուրթից մուգ քսեք: Հոնքերի եւ թարթիչների ներկը նույնպես ընտրում են դեմքին համապատասխան:
Ռուսական «Beautydream.ru» կայքը նշում է այս տարվա նորաձեւ երանգները, ըստ որի՝ դեմքը ամբողջությամբ պետք է մոնոտոն լինի, շուրթերը` հազիվ նշմարվող վարդագույն, ծիրանագույն, շագանակագույն, գազարագույն եւ բեժ: Հոնքերը դեռեւս նորաձեւ են հաստ եւ երկար տարբերակով, իսկ աչքերը նորաձեւ են սեւով ընդգծած տարբերակով, այնպես, որ աչքերի հայացքը նման լինի կատվի հայացքին: Եթե աչքերը մեծ են, մասնագետները խորհուրդ են տալիս սեւ մատիտը հաստ քսել, իսկ փոքր եւ նեղ աչքերը կարող եք ընդգծել սպիտակ կամ ոսկեգույն մատիտով:
Պատրաստեց ԱՆՈՒՇ ՄԱԹԵՎՈՍՅԱՆԸ
Կարդացեք նաև
«Առավոտ» օրաթերթ
11.03.2015
