«Երբ ես 5-6 տարեկան էի, Կոմայգում կոշկակարի բուդկա կար: Հնդկական կինոյի նկարներ… բան, որ պատկերացնեք: Շատ հայրենասեր մարդ էր, մազապուրծ եղած: Այդ մարդը միշտ շատ ահավոր պատմություններ էր պատմում, ողորմի իրան: Հիմա վերջերս որ բուդդիզմով հետաքրքրվում եմ, այնպիսի տպավորություն է մոտս, որ այդ մարդու հոգին մասնատվել է ու ստեղծվել է հավաքական ժառանգությունը: Հիմա բաներ են անում…հասկացանք, ես ընդունում եմ, որ այս երկրում Զարուհի Փոստանջյանի նման հայրենասեր մարդ գոյություն չունի: Ես պատրաստ եմ ստորագրել դրա տակ: Բայց մենք մեղք ենք, էլի: Դնում եք մեզ մի կացության մեջ՝ բարդ է»,- այսօր ԱԺ արտաքին հարաբերությունների հանձնաժողովում այսպիսի տեսակետ հայտնեց Ալեքսանդր Արզումանյանը՝ Զարուհի Փոստանջյանի նախագծի վերաբերյալ:
Իսկ Զարուհի Փոստանջյանը հայտարարության նախագիծ էր առաջարկում ընդունել «Հայոց ցեղասպանության 100-րդ տարելիցի համահայկական հռչակագրի ընդունման մասին»: Նախագիծը տառացիորեն նույն համահայկական հռչակագիրն է, ոչ մի ստորակետի փոփոխություն չկա:
Ըստ Ալեքսանդր Արզումանյանի, իրավունք չունեն առանց արտգործնախարարության եզրակացության, նման հայտարարություն ընդունել, ով էլ ուզում է լինի նախարարը. «Սա պետական արտաքին քաղաքականության խնդիր է: Մենք Թուրքիայի հետ որեւէ տարածքային բան չունենք: Դուք դոկտրին եք առաջարկում: Ասում եք 1999-ից ոչ մի բան չեն արել: Րաֆֆի Հովհաննիսյանը մեր պետության առաջին արտգործնախարարն էր, թող այդ հիմքը դներ, մեզ էլ հանձնարարեր՝ իրականացնեինք: Չի արել: Ափսոս, ընտրություններով Րաֆֆի Հովհաննիսյանը նախագահ չեղավ, թե չէ Թուրքիայի կեսը հիմա մերը կլիներ: Չի՛ կարելի, Զարուհի՛»:
Ալեքսանդր Արզումանյանն ասաց, որ համահայկական հռչակագրի՝ ուրիշի գրած տեքստի մեջ փոփոխություն անելն անհնար է. «Համահայկական հռչակագիր է արդեն ընդունվել իմ ու քո անունից: Ընդունվել վերջացել է, հիմա ի՞նչ ենք ուզում: Չվտանգենք: Մեր խնդիրն է միջոցառումները նորմալ անցկացնենք: Մենք առանց այն էլ պրոբլեմներ ունենք, ինչի՞ ենք նոր պրոբլեմ սարքում: Թուրքիայի հետ մենք հիմա ունենք հարաբերություն, ինչի՞ ենք դժվար կացության մեջ դնում մեր պետությունը»:
Կարդացեք նաև
Ալեքսանդր Արզումանյանն առաջարկեց, որ նախ, թող արտգործնախարարությունը տեղեկանք տա:
Հռիփսիմե ՋԵԲԵՋՅԱՆ
