Երևանի թատրոնի և կինոյի պետական ինստիտուտի հարակից փողոցն այսօր հանդիսավորությամբ կոչվեց ֆրանսահայ անվանի կինոգործիչ Անրի Վեռնոյի անունով: Նույն փողոցում բացվեց նաև արվեստագետի հուշաքարը:
«Ելույթին պատրաստվելիս բազմաթիվ բառեր անցան մտքովս՝ հիշողություն, հպարտություն, հարգանք, կամք, հավերժություն… Այս բառերը, որ հատուկ արձագանք են ստանում այս տարի, ցանկացա ամփոփել մեկ բառով՝ շնորհակալություն: Փողոցի անվանակոչումը և հուշաքարի բացումն ապրիլին իրականացնելու որոշումը հատուկ խորհուրդ ունի: Հայերի միասնականությունը մեր այբուբենն է, մեր ուժը մեր միասնությունն է, և այսօրվա իրադարձությունն այդ միության լավագույն դրսևորումներից է»,- փողոցի անվանակոչման հանդիսավոր արարողության ժամանակ ասաց Անրի Վեռնոյի որդին՝ Պատրիկ Մալաքյանը:
«Մեր երկրում շատ գործիչներ կան, որոնք իրենց գործունեությամբ մեծ ավանդ են ունեցել սփյուռքի և Հայաստանի ժողովրդի հետեղեռնյա վերածննդի գործում,- ասաց Երևանի գլխավոր ճարտարապետ Տիգրան Բարսեղյանը.- Անրի Վեռնոյն այդ գործիչներից մեկն է, որով էլ հիմնավորվում է այս փողոցի անվանակոչումը նրա անունով՝ խորհրդաշնելով իր ժամանակակիցների ունեցած համանման ավանդը»:
Կարդացեք նաև
Փողոցի անվանակոչման և հուշաքարի բացման արարողությունից հետո Երևանի թատրոնի և կինոյի պետական ինստիտուտի երկրորդ հարկում հանդիսավորությամբ բացվեց նաև Անրի Վեռնոյի անվան կինոդահլիճ, որին հաջորդեց արվեստագետին նվիրված հուշ-երեկո: Հանդիսատեսին ներկայացվեցին նրա կենսագրության հիշարժան դրվագները:
Միջոցառմանը ներկա էին ՀՀ մշակույթի նախարար Հասմիկ Պողոսյանը, ՀՀ սփյուռքի նախարար Հրանուշ Հակոբյանը, Երևանի քաղաքապետ Տարոն Մարգարյանը, ֆրանսիական և հայկական կինոյի հայտնի գործիչներ, Անրի Վեռնոյի ընտանիքի անդամները, ընկերները և ուրիշներ:
Ինչպես արդեն տեղեկացրել ենք, ապրիլի 2-5-ը Անրի Վեռնոյին նվիրված օրեր են Երևանում, և կազմակերպվող միջոցառումների շրջանակներում ապրիլի 2-ին Երևանի կամերային պետական թատրոնում տեղի ունեցավ Անրի Վեռնոյի «Մայրիկ» վերահրատարակված գրքի շնորհանդեսը:
Իսկ ապրիլի 5-ին Համազգային թատրոնում կցուցադրվեն Ա. Վեռնոյի մի քանի ֆիլմեր:
Սիրանուշ ՀԱՅՐԱՊԵՏՅԱՆ
