Նիդերլանդների խորհրդարանը երեկ ընդունել է բանաձեւ, որը ճանաչում է Օսմանյան թուրքերի կողմից Առաջին համաշխարհային պատերազմում իրականացված ասորիների, հույների եւ հայերի ցեղասպանությունը: Բանաձեւը, ըստ Aina.org-ի, ներկայացրել է խորհրդարանի «Քրիստոնեական միություն» կուսակցության պատգամավոր Ջոել Վորդեւինդը:
Նշվում է, որ բանաձեւին մասնակցել են խորհրդարանի մի շարք կուսակցություններ: Բանաձեւին դեմ են եղել խորհրդարանի երկու թուրք անդամներ, բայց այն անցել է ձայների մեծամասնությամբ: «Այս շարժման նպատակը Հայոց ցեղասպանությունը ու ասորիների ցեղասպանությունը ճանաչելն եւ Թուրքիայի կառավարությանը Հայաստանի կառավարության հետ մերձեցնելն է»,- ասել է բանաձեւի հեղինակը:
Ջոել Վորդեւինդը նաեւ հավելել է, որ սա շատ կարեւոր ազդակ է Նիդերլանդների խորհրդարանի կողմից թուրքական կառավարությանը, անցյալում իր կատարածները ընդունելու համար: «Ես հույս ունեմ, որ վերջում սա կբերի երկու երկրների հաշտեցմանը եւ իրար ավելի լավ հասկանալուն»:
Պատրաստեց Աշոտ ԻՍՐԱԵԼՅԱՆԸ
