Քիչ առաջ ոստիկանները բռնի ուժով Հանրապետության հրապարակում գտնվող «Արմենիա Մարիոթ» հյուրանոցի տարածքից հեռացրել են «Հիմնադիր խորհրդարանի» պաշտպանության համար բողոքի ակցիա անող 4 կանանց, խլել նրանց ձեռքից ցուցապաստառները եւ ծակել ձերբակալված Ժիրայր Սեֆիլյանի, Գարեգին Չուքասզյանի եւ այլ անդամների անուններով փուչիկները:
Aravot.am-ի հետ զրույցում կանանցից մեկը, որը ներկայացնում էր «Հայ կանանց ճակատը», պատմեց. «Մենք առավոտյան ցուցապաստառներով լուռ ակցիա էինք անում, ոչ մի ավելորդ բան մեզ թույլ չենք տվել: Ձեռքերումս եղել են փուչիկներ ձերբակալված տղաների անուններով եւ պաստառներ: Իրենք մոտեցան, մեզ արգելեցին այդտեղ կանգնել: Բրդելով քարշ տվեցին դեպի մայթ, ասեցին՝ թույլ չենք տալու: Ստիպված եղանք նստել սրճարանում, քանի որ հասկացանք, որ ցանկանում էին մեզ բերման ենթարկել: Սրճարանում իրենք մոտեցան, մեր ձեռքից զոռով խլեցին պաստառները, ասեղներով պայթեցրեցին փուչիկները»:
Մեր հարցին՝ Ձեզ բացատրություն տվեցի՞ն, որ դուք հյուրերի խայտառակում եք երկիրը, դրա համար ստիպված են հեռացնել՝ պատասխանեց. «Ոչ, ուղղակի ասացին՝ իրավունք չունեք ակցիա անեք: Ասեցի, որ դա մեր Սահմանադրական իրավունքն է, ազատ խոսքի իրավունքը»:
Կարդացեք նաև
Կանայք վստահեցրին, որ իրենք հասարակական կարգը չեն խախտել, պարզապես լուռ ակցիա են արել: Նրանք պատմեցին, որ իրենց անդամներից ձերբակալել են Անի Նավասարդյանին, իսկ իրենց միայն հրել են եւ ճնշում գործադրել:
Երբ ակցիայի մասնակիցները նստեցին «Հիմնադիր խորհրդարանի» պաստառով ավտոմեքենան եւ փորձում էին հեռանալ, նրանց հետեւից ոստիկանական մեքենա գնաց:
Հռիփսիմե ՋԵԲԵՋՅԱՆ
Իսկ ինչու էին կանայք բռնի ուժով բողոքում…