Մայիսի 3-ի ԼՂՀ ԱԺ ընտրությունների արդյունքներով «Ազգային վերածնունդ» կուսակցությունը հաղթահարել է Ազգային ժողով մտնելու 5 տոկոսանոց արգելքը: Ազգային ժողովում կուսակցությունը կներկայացնի ԱՎԿ նախագահ Հայկ Խանումյանը:
Քարոզարշավի ժամանակ կուսակցությունը կարևորել է տնտեսական և քաղաքական ապակենտրոնացումը: Սա հատկապես վերաբերվում է համայնքներին: Կուսակցությունն առաջարկում է Արցախի գյուղական և քաղաքային համայնքների ռեսուրսների ավելացում, շրջվարչակազմերի լիազորությունների կրճատում և դրանց պատվիրակում համայնքներին: Կուսակցության առաջարկած մեխանիզմները թույլ կտան համայնքի բնակչին իր հիմնական խնդիրները լուծել հենց համայնքի ներսում:
«Ազգային վերածնունդ» կուսակցությունը ստեղծման պահից, 2013թ. ի վեր հանդես է գալիս որպես ընդդիմադիր կուսակցություն և հասարակության ուժեղացման տեսանկյունից կարևորում հզոր ընդդիմության առկայությունը: Սա հատկանշական է Արցախի ներկա քաղաքական իրողությունների պայմաններում, երբ 2010թ. ձևավորված Ազգային ժողովում ոչ մի ընդդիմադիր ուժ չկար: Հասարակության ուժեղացման գործում կուսակցությունն իր վրա է վերցրել քաղաքական համակարգի որակների բարձրացման խնդիրը:
Արտաքին քաղաքականության ոլորտում կուսակցությունը քարոզարշավի ժամանակ խիստ քննադատության է ենթարկել գործող իշխանություններին` Իրանի հետ հարաբերությունների բացակայության համար: Կարևորելով Արևմուտքի և Ռուսաստանի հետ առկա հարաբերությունները` կուսակցությունը մեծ տեղ է հատկացնում հարևան Իրանի Իսլամական Հանրապետության հետ սերտ առևտրատնտեսական և քաղաքական հարաբերությունների ստեղծմանը, տարբեր հարցերի շուրջ բարձր մակարդակի խորհրդակցություններին:
Կարդացեք նաև
«Ազգային վերածնունդ» կուսակցություն
5 մայիսի, 2015թ.
