Խորհրդարանի ՀՅԴ, «Ժառանգություն» խմբակցությունների եւ անկախ պատգամավոր Էդմոն Մարուքյանի նախաձեռնությանն այսօր ԱԺ տնտեսական հարցերի մշտական հանձնաժողովի նիստում միացան նաեւ ՀՀԿ եւ ԲՀԿ խմբակցությունները: Հարցը վերաբերվում էր ԱԺ որոշման նախագծին, որով առաջարկվում է ԱԺ տնտեսական հարցերի հանձնաժողովին վերապահել մոնիտորինգ`մշտադիտարկում իրականացնելու լիազորություն: Այլեւս, հաշվի առնելով գազի համակարգի ուսումնասիրման հարցերով «գազի» ժամանակավոր հանձնաժողովի եզրակացությունը, դրա քննարկման ընթացքում հնչեցված առաջարկությունները, ԱԺ տնտեսական հանձնաժողովին հնարավորություն է տրվում դրանք քննարկել բոլոր իրավասու մարմինների, այդ թվում նաեւ սպառողների շահերը պաշտպանող կազմակերպությունների եւ համակարգի ձեռնարկությունների հետ: Յուրաքանչյուր նստաշրջանում, տնտեսական հանձնաժողովը մեկ անգամ գրավոր եզրակացություն է ներկայացնելու ԱԺ-ին` կատարված առաջարկությունների իրացման վերաբերյալ`թե սակագների, թե առհասարակ համակարգի բարեփոխումների ուղղությամբ:
Նախագծի հիմնական զեկուցող Արծվիկ Մինասյանը կարծում է, որ այնուամենայնիվ, այն մեծածավալ աշխատանքը, որ կատարվել է, այդ թվում նաեւ ընդդիմադիրների ջանքերով ու ներգրավմամբ, շարունակվելու է:
Նախագիծն ընդունվեց: Միայն ՀԱԿ պատգամավոր Հրանտ Բագրատյանը չքվեարկեց: Aravot.am-ի հարցին ի պատասխան պարոն Բագրատյանն ասաց, որ իր կեցվածքը պայմանավորված է նրանով, որ ինքը չգիտե`թե ինչի՞ կբերի դա: Ըստ ընդդիմադիր պատգամավորի, հնարավոր է`դրական արդյունք տա, բայց հնարավոր է տնտեսական հանձնաժողովի անդամները թաղվեն այդ գործ մեջ:
Նելլի ԳՐԻԳՈՐՅԱՆ
