Գոհարիկ Գաբրիելյանն իր դատաքննական ցուցմունքում ասաց, որ իրեն ոստիկանության աշխատակիցները ճնշել են և պահանջել են անհրաժեշտ ցուցմունք տալ, որի մեծ մասն իրականությանը չի համապատասխանում: Նրան ու իր մորը 10 օր թույլ չեն տվել տուն գնալ և ճնշումների ազդեցության տակ կորզել են անհրաժեշտ ցուցմունքները
Կենտրոն եւ Նորք-Մարաշ վարչական շրջանների ընդհանուր իրավասության դատարանում, ուր շարունակվում են տարադրամի փոխանակման կետերի վրա ավազակային հարձակումների գործով դատական նիստերը, Էդիտա Ալիխանյանից հետո ցուցմունք տվեց Գոհարիկ Գաբրիելյանը:
Գոհար Գաբրիելյանը, ինչպես եւ Էդիտան աշխատել են Հայբիզնեսբանկում:
Նա մեղադրվում է բանկի գործառնական վարչության հաճախորդների սպասարկման մասնագետ Էդիտա Ալիխանյանի հետ համակարգչով բանկի հետ երկար ժամկետով պայմանագրեր կնքած ավանդատուների հաշվեհամարներից 119.900 ԱՄՆ դոլար եւ 23.923.795 ՀՀ դրամ հափշտակելու համար:
Կարդացեք նաև
Նա Էդիտայի ամուսնու, ամբաստանյալ Տիգրան Հովհաննիսյանի մտերմուհին է:
Դատարանում հրապարակվեց նախաքննության ժամանակ տրված Գաբրիելյանի ցուցմունքը:
Համաձայն այդ ցուցմունքի, գումարների հափշտակման մեխանիզմը եղել էր հետեւյալը:
Տուժող ավանդատու Աստղիկ Գրիգորյանի ավանդային պայմանագիրը 30 000 ԱՄՆ դոլարի, նա խզել էր, փոխանցել նույն ավանդատուի ցպահանջ հաշվին, որից 20 000 դոլարը ելքագրվել էր, մուտքագրվել ավանդատուի մեկ այլ բանկային հաշվին: Այդ գումարն օրինակ, ի վերջո փոխանցվել էր Զարուհի Պետրոսյանի բանկային հաշվին, որի հաշվեհամարին գումարի մուտքագրման օրը նա ստացել է կանխիկ, եւ փոխանցել Տիգրան Հովհաննիսյանին:
Մնացյալ 10 000 դոլարը նույն եղանակով կանխիկացվել էր եւ կրկին գրպանվել:
Մեկ այլ դրվագով՝ Ռուբեն Մեսչյանի, ձեւակեդրպվել էր 30 000 ՀՀ դրամի ավանդ, սակայն գրպանվել էր երկու միլիոն դրամի չափով:
Ամբաստանյալ Գոհար Գաբրիելյանի մայրն էլ նախաքննության ժամանակ ցուցմունք էր տվել, թե իր դստեր եւ Տիգրանի մտերմությունից եղել է տեղյակ, փորձել է օգնել Տիգրանին, քանի որ նա ավտոմեքենաների առքուվաճառքով էր զբաղվում: Բազմաթիվ անգամ ներկայացել են այս գործով տուժող ճանաչված Հայբիզնեսբանկ, ստացել են իրենց անվամբ գրված գումարները, որոնք ամբողջությամբ հանձնել են Տիգրան Հովհանիսյանին:
Մեկ անգամ էլ Գոհարը զանգել էր, մորից խնդրել վիրակապ, դեղորայք, երբ գնացել էր դստեր վարձակալած բնակարանը, տեսել էր ամբաստանյալներից Կարենին, Ռաֆոյին, Հայկին:
Հայկի դաստակն արյունոտված էր: Բուժքույր մայրը տեսնելով վերքը՝ հասկացել է, որ այն հրազենային էր: Մայրը կարել էր նաեւ Տիգրանի խնդրանքով երկու դիմակ: Ստույգ տեղյակ չի եղել, թե ինչի համար էր դրանք անհրաժեշտ եղել:
Նշեմ, որ ամբաստանյալների ցուցմունքները շարունակվում են, դեռ ցուցմունք չեն տվել բանդայի պարագլուխ հանդիսացող Ռաֆայել Հարոյանը, Տիգրան Հովհաննիսյանը, Հայկ Կոջոյանը, Կարեն Վարդանյանը, Մնացական Սարգսյանը:
Ռուզան ՄԻՆԱՍՅԱՆ
