20 տարվա ազատազրկման դատապարտված, «Բանդա 2»-ի գործով Ռաֆայել Հարոյանի պաշտպան, ՀՀ փաստաբանների պալատի անդամ Լիպարիտ Սիմոնյանը երկու օր առաջ ստացել է Մարդու իրավունքների Եվրոպական դատարան անցյալ տարվա դեկտեմբերի 20-ին ուղարկված դիմումի վերաբերյալ դատարանի ծանուցումը:
Այնտեղ նշված է, որ դիմումը կքննարկվի առաջին իսկ հնարավորության դեպքում:
Բողոքը ներկայացվել էր այն հիմքով, որ խախտվել է Եվրոպական կոնվենցիայի 6-րդ հոդվածի 3-րդ մասի «դ» կետը. այն է՝ դատաքննության ժամանակ Ռ.Հարոյանը զրկված է եղել իր դեմ վկայած միակ անձին հարցաքննելու հնարավորությունից:
Դատարանի իրավաբանական քարտուղար Արեւիկ Ստեփանյանը ծանուցել էր. «Գործի վարույթի ընթացքում հնարավոր է, որ Դուք դատարանից ստանաք գրավոր հարցումներ՝ տեղեկատվություն եւ այլ փաստաթղթեր ներկայացնելու խնդրանքով: Այդ հարցումներն անպատասխան թողնելը կարող է դատարանին հանգեցնել այն եզրակացության, որ դիմողն այլեւս շահագրգռված չէ հետամուտ լինել իր դիմումին, հետեւաբար, այն կարող է հանվել դատարանի գործերի ցուցակից»:
Հիշեցնենք, այս գործով մեղադրանք է առաջադրվել Ռաֆայել Հարոյանին, Տիգրան Հովհաննիսյանին, Կարեն Վարդանյանին, Հայկ Կոջոյանին, Մնացական Սարգսյանին, Էդիտա Ալիխանյանին, Գոհար Գաբրիելյանին, Վահե Ստեփանյանին եւ Մառլեն Մուրադյանին: Նրանք մեղադրվել են տարադրամի փոխանակման կետերի եւ այնտեղ աշխատող անձանց նկատմամբ ավազակային հարձակումներ կատարելու, ինչպես նաեւ «Հայբիզնեսբանկ» ՓԲ ընկերությունից համակարգչային տեխնիկայի օգտագործմամբ առանձնապես խոշոր չափի գումարի հափշտակության համար: Նախաքննությունն իրականացնող մարմինն այս խմբի պարագլուխ էր համարել Ռաֆայել Հարոյանին, որն ըստ նրանց, ստեղծել եւ անձամբ ղեկավարել է զինված խումբը` բանդան, որոշակի դերաբաշխմամբ:
Կարդացեք նաև
Տուժողների մեջ նշվել էր «Դաշինք» սահմանափակ ընկերության հիմնադիր Բաբկեն Հովհաննիսյանը, որի նկատմամբ ավազակային հարձակում էր տեղի ունեցել իր տան շքամուտքի մոտ: Մեղադրյալները դարանակալել էին Հովհաննիսյանի շքամուտքում, մարմնական վնասվածք էին հասցրել նրան, ու հետագայում դիմել փախուստի:
Ռ. Մ.
«Առավոտ» օրաթերթ
10.04.19
