Այսօր նոր կառավարության կազմում իր պաշտոնավարման մեկ տարվա ընթացքում նախարարության կատարած աշխատանքներն ամփոփեց ՀՀ սպորտի եւ երիտասարդության հարցերի նախարար Գաբրիել Ղազարյանը:
Նախարարը խոսեց մարզեր կատարած իր այցելությունների մասին՝ նշելով, որ եկել է այն եզրահանգման, որ ֆիզիկական կուլտուրայի եւ սպորտի մասսայականացման նպատակով, թերեւս, ամենակարեւորը հանրակրթական դպրոցներում տարվելիք աշխատանքն է: Այն նպատակային կազմակերպելու նպատակով ՀՀ նախագահի եւ վարչապետի հանձնարարությամբ սպորտի եւ երիտասարդության հարցերի, տարածքային կառավարման եւ արտակարգ իրավիճակների, կրթության եւ գիտության նախարարությունների եւ Երեւանի քաղաքապետարանի հետ համատեղ ստեղծվելու է միջգերատեսչական հանձնաժողով:
Գաբրիել Ղազարյանը կարեւորեց նաեւ միջազգային համագործակցությունը՝ միջազգային փորձի, հարեւան երկրներում իրագործվող ծրագրերի համակողմանի ուսումնասիրությունը, նշեց, որ ֆիզիկական կուլտուրայի եւ բարձրագույն նվաճումների սպորտի ոլորտում համագործակցության բազմաթիվ հարցեր արդեն գործնականորեն քննարկելու նպատակով մոտ ժամանակներս իր հրավերով Երեւան են ժամանելու ՌԴ, Վրաստանի, Բելառուսի, Ղազախստանի սպորտի ոլորտի ղեկավարները:
Աշոտ ՀԱԿՈԲՅԱՆ
Կարդացեք նաև
