«2005 թվականից իրականացվող «Ազգային պատկերասրահ» միջազգային երաժշտական փառատոնը սպասված տոն է երաժշտասերների համար, իսկ փառատոնի յուրաքանչյուր համերգ՝ բարձր արվեստի հետ հաղորդակցվելու հիանալի հնարավորություն՝ դասական երաժշտության իրական երկրպագուների համար»,- այսօր լրագրողների հետ հանդիպման ժամանակ ասաց «Արվեստների պատկերասրահ» մշակութային հիմնադրամի նախագահ Մարիամ Շահինյանը:
Երաժշտական փառատոնն այս տարի կմեկնարկի հունիսի 18-ին և մինչև հուլիսի 4-ը Հայաստանի ազգային պատկերասրահի Որմնանկարների սրահում կանցկացվեն տարաբնույթ համերգ-երեկոներ: Արդեն ավանդական դարձած փառատոնն այս տարի կներկայանա 5 համերգով:
Հայոց ցեղասպանության 100-րդ տարելիցին նվիրված բացման համերգին ելույթ կունենան դաշնակահարուհի Սվետլանա Նավասարդյանը, օպերային թատրոնի մեներգչուհիներ Արծվիկ Դեմուրչյանը (սոպրանո), Քրիստինե Սահակյանը (մեցցո-սոպրանո), Հայաստանի պետական կամերային նվագախումբը (գեղարվեստական ղեկավար և գլխավոր դիրիժոր՝ Վահան Մարտիրոսյան):
«Սա մի փառատոն է, որին արվեստասեր հասարակությունը սպասում է մեծ անհամբերությամբ: Փառատոնն էլ մշտապես կարողանում է հաճելի անակնկալներով զարմացնել իր հանդիսատեսին»,- ասաց մշակույթի նախարարության Ժամանակակից արվեստի վարչության պետի տեղակալ Արմինե Ղազարյանը:
Կարդացեք նաև
Նշենք, որ փառատոնը կազմակերպում է «Արվեստների պատկերասրահ» մշակութային հիմնադրամը՝ ՀՀ մշակույթի նախարարության աջակցությամբ:
«Ազգային պատկերասրահ» միջազգային երաժշտական 11-րդ փառատոնի երկրորդ համերգը կկայանա հունիսի 21-ին: Երաժշտության համաշխարհային օրվան նվիրված ծրագրով հանդես կգան Գայանե Գեղամյանը (սոպրանո) և Սեդրակ Երկանյանը (դաշնամուր): Վոկալ երաժշտության երեկոյի ընթացքում կներկայացվեն ֆրանսիացի և իսպանացի կոմպոզիտորների վոկալ ստեղծագործությունները:
Հունիսի 24-ին կամերային երաժշտության երեկո է լինելու, որի ընթացքում հայ արվեստասեր ունկնդրին տարբեր ստեղծագործություններ կներկայացնեն Հասմիկ Վարդանյանը (թավջութակ) և Նարա Ավետիսյանը (դաշնամուր, ԱՄՆ):
«Ազգային պատկերասրահ» փառատոնի նախավերջին համերգը հունիսի 27-ին է: Գործիքային երաժշտության երեկոյի ընթացքում հանդես կգա Իոսիֆ Պուրիցը (բայան, Ռուսաստան):
Միջազգային երաժշտական 11-րդ փառատոնի հանդիսավոր փակման համերգը տեղի կունենա հուլիսի 4-ին: «Օպերային արվեստի գոհարներ» խորագրով համերգային ծրագիրը կներկայացնեն Վարդուհի Խաչատրյանը (մեցցո-սոպրանո, Շվեյցարիա), Լիպարիտ Ավետիսյանը (տենոր), Դավիթ Բաբայանցը (բարիտոն), Արմեն Աղաջանյանը (դաշնամուր): Ծրագրում ընդգրկված են հայ, ռուս և արևմտաեվրոպական կոմպոզիտորների հատընտիր ստեղծագործություններ:
Սիրանուշ ՀԱՅՐԱՊԵՏՅԱՆ
