Թուրքիայի արտաքին գործերի նախարարությունն անդրադարձել է Բելգիայի վարչապետ Շարլ Միշելի այն հայտարարությունը, թե 1915 թվականի իրադարձությունները պետք է համարվեն ցեղասպանություն: ԱԳՆ-ի կայքում այսօր հրապարակված հաղորդագրությունում նշված է, որ Բելգիայի վարչապետի հայտարարությունն անհամատեղելի է պատմական փաստերի եւ միջազգային իրավունքի հետ:
«Ոչ ընդունելի է, ոչ էլ արդարացված այն, որ Բելգիայի վարչապետը լկտիաբար ենթադրում է, որ կարող է վճիռ արձակել մի հարցի մասին, որի շուրջ երբեք դատական որոշում կամ գիտական փոխհամաձայնություն չի եղել եւ թեեւ նա ինքն ընդունում է, որ ոչ մի իրավասու միջազգային դատարան վճիռ չի կայացրել այս հարցի շուրջ»,- մասնավորապես նշված է հայտարարությունում:
Ըստ ԱԳՆ-ի՝ նրա հայտարարությունները նաեւ հակասում են Բելգիայի կառավարության դիրքորոշմանը. «Թուրք ազգի նկատմամբ դիրքորոշման նման արագ փոփոխությունը հստակ ցույց է տալիս, թե որքան հեռու է հարցը գնացել գիտական, դատական եւ քաղաքական հարթակներից»:
Թուրքիայի արտաքին քաղաքական գերատեսչությունը նաեւ նշել է, որ իրենք արդեն անհանգստությամբ դիտարկում են Բելգիայի կողմից թուրքերի դեմ ուղղված մեղադրական գործունեության եւ հայտարարությունների աճը: ԱԳՆ-ի հայտարարությունում գրված է, որ դա անում է մի երկիր, որը դեռ չի բախվել իր պատմության մութ էջերին:
Կարդացեք նաև
Թուրքիայի ԱԳՆ-ն կարծում է, որ այսպիսի իրավիճակը կվիրավորի Բելգիայում թուրքական համայնքին եւ, մեղմ ասած ու ակնհայտորեն որեւէ դրական ազդեցություն չի ունենա Բելգիայում նրանց հետագա ինտեգրմանը:
ԱԳՆ-ն նաեւ սպառնացել է, որ այս վերաբերմունքը, որը նաեւ խանգարում է Բելգիայում թուրքական համայնքին, անբարենպաստ հետեւանքներ կունենա երկու երկրների հարաբերությունների համար:
Պատրաստեց Աշոտ ԻՍՐԱԵԼՅԱՆԸ
