«Ոչ թալանին» նախաձեռնության անդամներն այսօր արդեն չորրորդ օրն են շարունակում նստացույցը Ազատության հրապարակում: Այնտեղ ուրախ մթնոլորտ է, երգում են, պարում:
Ակտիվիստները մտադիր չեն հրաժարվել իրենց պայքարից: Քաղաքացիները պարբերաբար մոտենում են նստացույց անող երիտասարդներին ու հետաքրքրվում իրենց անելիքներով, մասնավորապես` ինչ է լինելու այսօր երեկոյան ու գովելով երիտասարդներին` հեռանում:
Հիշեցնենք, որ այսօր երեկոյան լրանում է նստացույցի ժամկետը: Նախաձեռնության անդամները ավելի վաղ հայտարարել էին, որ եթե իշխանությունները զիջումների չգնան, իրենք այսօր երեկոյան դադարեցնելու են նստացույցը Ազատության հրապարակում եւ գնալու են ուղիղ Բաղրամյան 26` նախագահական նստավայր:
Կարդացեք նաև
Քաղաքացիներից մի տարեց մարդ, այսօր ոգեւորությունից նույնիսկ պարում էր Ազատության հրապարակում: Մեր հարցին, թե ինչ ակնկալիքներ ունի` էլեկտրաէներգիայի սակագնի բարձրացման հարցում իշխանությունները կվերանայե՞ն իրենց որոշումը, պատասխանեց. «Չեմ հավատում, եթե մեր ժողովուրդը մտածում է իր հետնորդների, թոռների մասին, ամբողջությամբ պետք է լցվեն այս հրապարակում, որ կարողանանք ինչ-որ բանի հասնել: Սերժիկը շատ պինդ նստած է գահին, գիտի` հազար տարի է ապրելու»:
Արփինե ՍԻՄՈՆՅԱՆ
