Ուղղափառ երկրների միջպառլամենտական վեհաժողովի հայկական պատվիրակության ղեկավար, ՀՀԿ-կան պատգամավոր Մկրտիչ Մինասյանը եւ ԱԺ պատգամավոր Արագած Ախոյանն այսօր «Հայացք» մամուլի ակումբում պատմեցին վեհաժողովի աշխատանքների մասին: Օրերս նրանք Վիեննայում, ի թիվս 28 երկրների ներկայացուցիչների, մասնակցել են Ուղղափառ երկրների միջպառլամենտական վեհաժողովի աշխատանքներին: Վեհաժողովին մասնակցել են հայեր Իրանի պառլամենտից, Իտալիայի հայ համայնքի ղեկավարը, Լիբանանից:
Վեհաժողովն անցած տարի, հիշեցնենք, դատապարտել էր Հայոց Ցեղասպանությունը: Ժամանակին ԼՂՀ հարցին էլ է անդրադարձ կատարել`ազգերի ինքնորոշման իրավունքը գերադասելով: Տարիներ առաջ վեհաժողովը նաեւ անդրադարձել է հայկական եկեղեցիների, պատմական հուշարձանների նկատմամբ ոտնձգություններին ու վայրագություններին`դատապարտելով դրանք:
Արագած Ախոյանն այս կառույցը կարեւոր է համարում, հատկապես, որ բոլորս ենք տեսնում, թե այսօր Մերձավոր Արեւելքում ինչպես է քրիստոնյա աշխարհն ընկրկում:
Մկրտիչ Մինասյանը տեղեկացրեց, որ հայկական պատվիրակությունն, ի դեմս Արագած Ախոյանի, պատրաստել էր 11 րոպեանոց ֆիլմ եւ այն ներկայացրել է վեհաժողովում` պատմական հայրենիքում հայերի արդի խնդիրների մասին, Թուրքիայի կողմից վարվող հայատյաց քաղաքականության, ինչի արդյունքում այնտեղ բնակվող հայերից շատերն իրենց ինքնության մասին խուսափում են խոսել:
Կարդացեք նաև
Ընդունվել է բանաձեւ`դատապարտելով Սիրիայում, Հյուսիսային Քրդստանում, Լիբանանում, Կիպրոսում բնակվող ազգային փոքրամասնությունների նկատմամբ ոտնձգությունները, աշխարհին տոլերանտության կոչ հղել:
Բանախոսները տեղեկացրին, որ արդի աշխարհում կատարվող ցեղասպանությունները եւ ազգային փոքրամասնությունների նկատմամբ ոտնձգությունները, պատվիրակները դիտարկել են ժամանակին Հայոց Ցեղասպանության չդատապարտման համատեքստում`նշելով, որ աշխարհի հզորները առայժմ առաջնային են համարում իրենց տնտեսական շահերը`շարունակելով լռել թուրքերի կատարած վայրագությունների մասին:
Հաջորդ վեհաժողովը տեղի կունենա ամենայն հավանականությամբ Սալոնիկում: Հայաստանում երկու տարի առաջ է եղել:
Հայոց Ցեղասպանության հարյուրամյա տարելիցի օրերին վեհաժողովի 37 հոգանոց պատվիրակությունն էլ Երեւանում էր, ինչի մասին նյութերը զետեղվել են ամենամյա բյուլետենում:
Նելլի ԳՐԻԳՈՐՅԱՆ