Եվրոպական խաղերում Հայաստանի օլիմպիական պատվիրակության մամուլի քարտուղար, մարզական մեկնաբան Կարեն Գիլոյանն այսօր «Պոստ Սկրիպտում» ակումբում կայացած մամուլի ասուլիսում ասաց, որ Բաքվում գտնվելու ողջ ընթացքում Հայաստանի պատվիրակությունն իսկապես գտնվել է բոլորի ուշադրության կենտրոնում: «Բոլորն ուզում էին մեզ հետ հարցազրույց անել: Հասկանալի է, ոմանք ուզում էին պղտորել ջուրը՝ ձուկ որսալու համար: Մենք էլ աշխատում էինք խոսել առանց ավելորդ զգացմունքայնության, սառը: «Ինձ հարցրին, թե ի՞նչ էինք զգում առաջին օրը, երբ շքերթն անցնելիս սուլում էին: Ես պատասխանեցի՝ սուլողներին հարցրեք, մենք ոչինչ չենք զգացել, մենք մեր պարտքը կատարել ենք, մեր շրջանն անցել: Մեր մարզիկների հետ էլ ուզում էին հարցազրույցներ անել: Բայց քանի որ գիտակցում ինք, թե մեկ բառը ինչ հետեւանքներ կարող է ունենալ, փորձում էինք ամեն ինչ անել հավասարակշռված: Նույնիսկ խնդրում էինք, որ Երեւանում մեր հոդվածների տակ քոմենթները շատ բաց չգրվեն, որովհետեւ ադրբեջանական լրատվամիջոցները մանրակրկիտ հետեւում ու արձագանքում էին անմիջապես: Օրինակ, իմ ընկերներից մեկը քոմենթ էր գրել, թե Գիլոյան, դու Բաքուն գրավելու փորձ ունես՝ նկատի ունենալով, որ 2007 թվականին մեր հավաքականի հետ այնտեղ եղել եմ ըմբշամարտի աշխարհի առաջնության ժամանակ: Ադրբեջանական լրատվամիջոցներում, այդ քոմենթով հայտնվեց մի հոդված, թե հայ ֆաշիստները չեն դադարում իրենց մեկնաբանություններն անել ու ենթադրություն, որ Կարեն Գիլոյանն արդեն Բաքվում եղել է: Իհարկե, եղել եմ:
Մենք ադրբեջանական երեք հեռուստաընկերության բացառիկ հարցազրույց ենք տվել եւ ամեն ինչ ասել ենք: Հոդվածներն էլ այդպես վերնագրում էին. «Չենք վախեցել, եթե վախենայինք, չէինք գա»: Ամբողջ տրամաբանությունը եղել է այն, որ սա մրցում է, մենք եկել ենք մասնակցելու եւ հաղթելու»:
Աշոտ ՀԱԿՈԲՅԱՆ