Այսօր ԵՊՀ իրավաբանության ֆակուլտետում Վենետիկի հանձնաժողովի անդամները հանդիպում ունեցան խորհրդարանական խմբակցությունների, արտախորհրդարանական ուժերի, ՀԿ-ների ներկայացուցիչների հետ՝ քննարկելու Սահմանադրական փոփոխությունների նախագիծը:
ԲՀԿ խմբակցության ղեկավար Նաիրա Զոհրաբյանը հարցրեց. «Ինչպե՞ս կարող ենք հանել մտահոգությունը, որ մի քաղաքական ուժ կարող է մենիշխանություն հաստատել»:
Վենետիկի հանձնաժողովի անդամներից մեկը՝ Կրիստոֆ Գաբենվարտերը պատասխանեց. «Եվրոպական սահմանադրությունների փորձը նայելով՝ Վենետիկյան հանձնաժողովն ընդունում է, որ քաղաքական կայունությունը իրավական նպատակ է Սահմանադրության ձեւավորման գործընթացում: Կան տարբեր եղանակներ կայունությանը հասնելու: Պայմանները երկրից երկիր տարբերվում են: Սա այն կետն է, որտեղ մեր առաջադրանքը համընկնում է կոնկրետ երկրում ձեւավորված քաղաքական դաշտի նպատակների հետ: Մենք մտահոգություն էին արտահայտել այն ընթացակարգերի վերաբերյալ, որոնցով կարգավորվելու է երկրորդ փուլը: Մենք ունենք ընդհանուր ընկալում, որ գոյություն ունեն երկու խնդիրներ, որոնք ի սկզբանե պետք է լուծվեն: 201 հոդվածով կոշտ կանոնակարգում է նախատեսված, որը հնարավոր չէ փոխել զուտ սահմանադրական գործընթացով: Մեր կարծիքն արտահայտելուց հետո հոդվածն ավելի մանրամասն դարձվեց եւ խնդիրները դարձվեցին ավելի բարդ: Դրա համար մեր մոտեցումն այն էր, որ այս դրույթը կարճացվի, ճկունության բացակայությունը չպետք է տանի նրան, որ լինի ընդամենը մեկ եղանակ՝ երաշխավորելու կայունությունը: Դրա համար Սահմանադրական եղանակով չի կարելի պարտադրել այդ կայունության միակ եղանակը, պետք է լինի ընտրություն՝ այդ կայունությանը հասնելու համար: Մենք եթե ասենք հասել ենք կոմպրոմիսի՝ ոչ: Հասել ենք ընդհանուր ընկալման՝ հուլիսի 15-ի դրությամբ ինչ ունենք»:
Հռիփսիմե ՋԵԲԵՋՅԱՆ
