Ինչպես արդեն տեղեկացրել ենք, երեկ՝ օգոստոսի 25-ին, ՀՀ կրթության և գիտության նախարար Արմեն Աշոտյանը Գեղարքունիքի մարզում մասնակցում էր տեղի հանրակրթական դպրոցների մանկավարժների օգոստոսյան խորհրդակցությանը:
Մարզ այցի շրջանակներում նա եղավ նաև Գավառի պետական համալսարանում (ԳՊՀ), որտեղ բուհի ռեկտոր Ռուզաննա Հակոբյանը ներկայացրեց նախորդ տարվա ձեռքբերումները և նշեց, որ հաջորդ ձեռքբերումը նոր ուսումնական տարում լինելու է բուհի ենթակառուցվածքային և ինստիտուցիոնալ հավատարմագրումը, որը ենթադրում է հաստատության որակի գնահատում:
Ռ. Հակոբյանը նշեց նաև, որ ԳՊՀ-ում 2014 թվականին ձեռնարկվել են նպատակային միջոցառումներ՝ ԳՊՀ հակակոռուպցիոն ռազմավարական ծրագրի և ԳՊՀ ակադեմիական ազնվության հայեցակարգի դրույթների իրականացման ուղղությամբ. «Համալսարանն աշխատում է իր որդեգրած «Կրթություն՝ առանց կոռուպցիայի» և «Կրթությունն՝ ընդդեմ կոռուպցիայի» սկզբունքներին համապատասխան»,- ընդգծեց համալսարանի ռեկտորը:
«Բուհի ձեռքբերումները հետևողական աշխատանքի արդյունք են,- նկատեց Արմեն Աշոտյանը և շեշտեց, որ Գավառի պետական համալսարանը, կրթօջախ լինելուց զատ, նաև մեկ այլ կարևորագույն առաքելություն է իրականացնում. «Հատկապես մարզային բուհերը Նախարարության կողմից դիտվում են որպես կարևորագույն կառույցներ մարդկանց տեղերում պահելու գործում: Խոստովանենք, որ բուհի գոյությունը չի ենթադրում միայն կրթական ծառայությունների մատուցում. բուհի գոյությունը մարդուն հողին կապելու առաքելության մեջ է նաև: Իհարկե, ես շատ եմ ուրախանում, երբ մայրաքաղաքի բուհերում տեսնում եմ մարզաբնակ ուսանողների, բայց դա էլ չափ ունի: Եվ շատ կարևոր է, որ մարզերի բուհերը կարողանան իրենց կարևոր գործն անել՝ կապել երիտասարդին իր հողին, իր մարզին՝ կանխելով կրթական միգրացիան դեպի մայրաքաղաք, որը հետագայում վերածվում է նաև աշխատանքային միգրացիայի»:
Կարդացեք նաև
Կրթության և գիտության նախարարը կարևորեց մեր երկրում այնպիսի միջավայրի ստեղծումը, որտեղ երիտասարդն իր ուժերով, իր խելքով կկարողանա ընտանիք պահել, հասարակության մեջ իրեն գնահատված զգալ, թե´ բարոյապես, թե´ ֆինանսապես ամուր լինել. «Սա է բարձրագույն կրթության կարևորագույն առաքելություններից մեկը: Եվ մենք պետք է հասնենք այն վիճակին, որ երիտասարդների բարեկեցությունն ուղղակիորեն կախված լինի իրենց գիտելիքներից, հմտություններից ու իրենց աշխատելու հնարավորություններից: Սա այն լավագույն մոդելն է, որին ձգտում են եվրոպական բոլոր երկրները»,- նշեց նախարարը:
Սիրանուշ ՀԱՅՐԱՊԵՏՅԱՆ
Լուսանկարը՝ Զոհրապ ԵԳԱՆՅԱՆԻ
Աշոտյանն ասում է երիտասարդն իր ուժերով, իր խելքով կկարողանա ընտանիք պահել:
Ինքն է խելքով ընտանիք պահում, թե իր սանիկ ու պատգամավոր Կարեն Ավագյանը??? Լիսկայի որդին է խելքով ընտանիք պահում, թե վարչապետի փեսան կամ որդին??? Կարելի է անվերջ թվարկել: Ցինիզմն էլ պիտի սահման ունենա, Աշոտյան տղա: