ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի կարծիքով` ադրբեջանցիների` Սարսանգի ջրամբարի հետ կապված հարցի շահարկումը շանտաժ է:
Ինչպես արդեն տեղեկացրել ենք, Ադրբեջանի արտգործնախարար Էլմար Մամեդյարովը ԵԽԽՎ զեկուցող, բոսնիացի խորհրդարանական Միլիցա Մարկովիչին բողոքել է, թե «Սահմանամերձ գոտու ադրբեջանական բնակչությունը զրկված է Լեռնային Ղարաբաղում գտնվող Սարսանգի ջրամբարից օգտվելու հնարավորությունից, հայերը թույլ չեն տալիս»:
Aravot.am-ը հետաքրքրվեց` արդյոք հայկական կողմը քայլեր չի՞ ձեռնարկելու այս հարցի կապակցությամբ և մտավախություն չունե՞ն, որ ադրբեջանցիների` այս հարցի նման հետևողականությամբ բարձրացումը կարող է հանգեցնել նրան, որ եվրոպացիները սկսեն հիմնավոր համարել նրանց դժգոհությունը, Արտակ Զաքարյանը պատասխանեց. «Ադրբեջանցիները բազմիցս շահարկել ու շահարկում են այս հարցը` անտեղյակ մարդկանց մոտ տպավորություն ստեղծելով, որ ԼՂՀ-ն էկոլոգիական շրջափակում է իրականացնում Դաշտային Ղարաբաղի որոշ բնակավայրերի նկատմամբ: Դա բացառապես ապատեղեկատվություն է և շահարկում, ինչ-որ տեղ նաև շանտաժ: Չեմ կարծում, որ բոլոր այն մարդիկ, որոնք խնդրի էությանը տիրապետում են, կարող են տրվել ադրբեջանական շանտաժին: Սարսանգի ջրամբարը բնական ռեսուրսների պաշար է, ծառայում է իր նպատակին:
Ինչ վերաբերում է մեր քայլերին, ապա նշված հարցի բարձրացման դեպքում մեր պատասխանը հստակ է. թող գնան, իրականացնեն մոնիտորինգ: Իհարկե, մտավախություն կա, որ անտեղյակ մարդիկ կարող են տրվել ադրբեջանական շանտաժին, բայց Սարսանգի ջրամբարի հետ կապված խնդիր գոյություն չունի»:
Կարդացեք նաև
Տաթև ՀԱՐՈՒԹՅՈՒՆՅԱՆ
