«Չեք անցկացնելու» նախաձեռնությունը «Ոչ»-ի ճակատի ձևավորման և պայքարի ձևաչափերի հստակեցման հարցերով հանդիպումներ է ունենում տարբեր քաղաքական ուժերի հետ: Հանդիպել են ՀԱԿ-ի, Հիմնադիր խորհրդարանի, «Ազատություն», «Հանրապետություն», ՀԺԿ, «Հայազն» կուսակցությունների հետ:
Aravot.am-ը նախաձեռնության ներկայացուցիչ Դավիթ Հովհաննիսյանից հետաքրքրվեց` մեկ ճակատում միավորման հարց քննարկվե՞լ է, նա պատասխանեց. «Քաղաքական ուժերի, ՀԿ-ների հետ քննարկել ենք համագործակցության տարբեր շրջանակներ ու ձևաչափեր»:
Դավիթ Հովհաննիսյանը նշեց, որ մինչև սեպտեմբերի 20-ը նախատեսում են «Ոչ-ի ճակատի համաժողով» համաժողով իրականացնել, որին մասնակցության համաձայնություն տվել են ՀԺԿ-ն, ՀԱԿ-ը: Այնուհետև ընդունելու են միասնական հայտարարություն: Բացի այդ նախատեսում են նաև հանրահավաք անցկացնել Գյումրիում:
Իսկ համագործակցության ձևաչափերի հետ կապված արդեն պայմանավորվածություն ունեն «Հանրապետություն» կուսակցության հետ. համագործակցելու են ընտրատեղամասերի վերահսկողության հետ կապված:
Կարդացեք նաև
Ինչ վերաբերում է «Չեք անցկացնելու» ճակատին նշված կուսակցությունների միանալու հարցին, Դավիթ Հովհաննիսյանն ասաց, թե այդ հարցով դեռ ոչինչ ասել չի կարող:
Տաթև ՀԱՐՈՒԹՅՈՒՆՅԱՆ
