ՀԱԿ խմբակցության ղեկավար Լեւոն Զուրաբյանը որեւէ գնահատական չցանկացավ տալ իրենց խմբակցության պատգամավոր Լյուդմիլա Սարգսյանի՝ Բաղրամյան 26 գնալու եւ Սերժ Սարգսյանի ձեռքը սեղմելու համար: Նա ասաց, որ հանրությունն է տվել դրա գնահատականը, գնացեք եւ խոսեք հանրության հետ, տեսեք, թե ինչ են ասում նրա քայլի մասին:
Aravot.am-ի հետ զրույցում այս առնչությամբ Լյուդմիլա Սարգսյանն արձագանքեց. «Հանրություն ասելով՝ Լեւոն Զուրաբյանը նկատի ունի ՀԱԿ-ամերձ շրջանակները: Որովհետեւ ես գիտեմ նաեւ այլ կարծիքներ: Իսկ ինչ վերաբերում է իրենց՝ գնահատականներ տալուն կամ չտալուն, այն գնահատականը, որը իրենք տվել են, «Չորրորդ իշխանությունում» ենք կարդում եւ ժամանակ առ ժամանակ արտահայտվում է նաեւ իրենց հովանու ներքո գտնվող կայքերում՝ իրենց այսպես ասած վերլուծաբանների գնահատականների տեսքով»:
Լեւոն Զուրաբյանը նաեւ ասել էր, որ հիմա շատերը գնում են Սերժ Սարգսյանի մոտ՝ բազարի. միայն այն հույսով, որ մեկ կամ երկու մանդատ պոկեն ապագա պառլամենտում: Սա է նրանց ամբողջ մոտեցումը:
Լյուդմիլա Սարգսյանը պատասխանեց. «Շատ բան կարելի է հիշեցնել, բայց ես դա չեմ անի: Իսկ ինչ վերաբերում է Լեւոն Զուրաբյանին, նա վերջին հեղինակությունը չի ինձ համար, որ նրա կարծիքն ինձ համար ճնշող լինի կամ որոշիչ լինի: Կա կուսակցություն, կա կուսակցության վարչություն եւ այդ վարչության որոշումներով է, որ ես առաջնորդվում եմ: Ինչ վերաբերում է մանդատին, դուք իրատեսակա՞ն եք համարում, որ կարելի է 1.5 տարի առաջ ինչ-որ բան պայմանավորվել, որը կարող է որոշիչ լինել: Կամ ո՞նց կարող ես առաջին անգամ, երբ գնում ես խոսելու կոնկրետ խնդրի շուրջ, դու քեզ թույլ տաս ինչ-որ այլ բաների մասին խոսել, քան Սահմանադրությունը: Որպեսզի արդարացնեն իրենց հրապարակումը օրեր առաջ, երբ մենք դեռ չէինք գնացել հանդիպման, իրենք ստիպված նման ձեւակերպումներ են տալիս: Ես էլ թեթեւ եմ տանում»:
Կարդացեք նաև
https://www.youtube.com/watch?v=jXvaqzZIAQE&feature=youtu.be
Հռիփսիմե ՋԵԲԵՋՅԱՆ
