Բաղրամյան պողոտայում իրավիճակը շարունակում է մնալ լարված: Քաղաքացիների մի հատված նստացույց է անում, մյուս հատվածը կոչերով է հանդես գալիս: Հորդորում են քաղաքացիներին իրենց միանալ և պահանջում են չեղարկում:
Քիչ առաջ ոստիկանությունը հայտարարությամբ հանդես եկավ, որ քաղաքացիների՝ Բաղրամյան փողոցում իրականացվող հավաքը անօրինական է և իրենք շեղվել են իրենց երթուղուց և ժամանակ տվեցին քաղաքացիներին ազատել Բաղրամյան պողոտան, այլապես իրավախախտները կենթարկվեն պատասխանատվության:
Հիշեցնենք, որ Երևանի փոխոստիկանապետ Վալերի Օսիպյանը զգուշացրել էր, որ եթե քաղաքացիները գնան Բաղրամյան, ապա ոստիկանությունը օրենքի սահմաններում հնարավոր է ուժ կիրառի:
Կարդացեք նաև
«Հայազն» կուսակցության վարչության անդամ Արմեն Մկրտչյանը մտահոգություն հայտնեց, որ հնարավոր է այսօր լինեն բռնություններ ցուցարարների նկատմամբ, ինչը երևում է ոստիկանության անընդհատ արվող հայտարարություններից:
Նշենք նաև, որ Բաղրամյան պողոտայում ոստիկանությունը ուժեր է կենտրոնացնում. անընդհատ Բաղրամյան են բերվում սաղավարտներով ու վահաններով զինված ուժեր:
Տաթև ՀԱՐՈՒԹՅՈՒՆՅԱՆ
