«Ոչ թալանին» նախաձեռնության անդամ Արամ Մանուկյանն Aravot.am-ի հետ զրույցում տեղեկացրեց, որ լուսադեմին, Բաղրամյան պողոտայից բերման ենթարկվածները հիմնականում ազատ են արձակվել: «Արաբկիրից, Զեյթունից բոլորին բաց էին թողել: Մաշտոցից, կես ժամ առաջվա դրությամբ մի քանի հոգու բաց էին թողել, բայց մարդիկ, որոնց հետ խոսեցինք, ասացին`հեսա բաց կթողեն, թղթաբանության հետ կապված խնդիրներ էին»:
«Ոչ թալանին» նախաձեռնության անդամները, հիշեցնենք, հերթական ցույց էին անցկացնում էլեկտրաէներգիայի թանկացման դեմ ու երեկ երեկոյան կրկին փակել էին Բաղրամյան պողոտան:
Ինչպես հայտնի է, Բաղրամյան պողոտայի «օպերացիայի» ժամանակ մի քանի հոգի վնասվածքներ են ստացել: Երկու հոգի`Արթուր Քոչարյանը եւ Վաղինակ Շուշանյանը հիվանդանոց էին տեղափոխվել: Արամ Մանուկյանը մանրամասնեց, որ Արթուր Քոչարյանի մոտ շնչառական խնդիրներ են եղել, արհեստական շնչառության ապարատը քիչ առաջ անջատել են, հետո նորից խնդիրներ են առաջացել, միացրել են: Իսկ Վաղինակ Շուշանյանի մոտ կողոսկրի խնդիրներ են եղել, նրան շտապօգնությունով են հիվանդանոց տեղափոխվել: «Բայց քաղմասում չի եղել, ավելի շուտ էր»,- ասաց Արամ Մանուկյանը:
Արամ Մանուկյանն, անդրադառնալով ոստիկանների կողմից խաղաղ ցույցը ցրելուն, ասաց, որ ցուցարարներն անօրինականություններ թույլ չեն տվել, իրացրել են Սահմանադրությամբ իրենց վերապահված իրավունքները: Թեպետ ոստիկանության գործողություններում բռնություններ, ուժի կիրառում չի եղել, բայց մեր զրուցակցի կարծիքով էլ, ցուցարարներին հարկադրանքով են հեռացրել Բաղրամյան պողոտայից:
Կարդացեք նաև
Թե ի՞նչ են պատրաստվում անել նախաձեռնության անդամները, դեռ պարզ չէ: Արամ Մանուկյանն ասաց, որ հետագա գործողությունների մասին ավելի ուշ կհայտարարեն:
Նելլի ԳՐԻԳՈՐՅԱՆ
Լուսանկարը՝ Արամ ՄԱՆՈՒԿՅԱՆԻ ֆեյսբուքյան էջից
