Սրտի համաշխարհային օրվա առիթով առողջապահության նախարարությունում կազմակերպված ասուլիսում Aravot.am-ը նախարարության բժշկական օգնության քաղաքականության վարչության պետ Ծաղիկ Վարդանյանից հետաքրքրվեց, թե ինչո՞ւ են մեր երկրից հեռանում սրտի լավագույն վիրաբույժները եւ այլ բժիշկ-մասնագետներ այն դեպքում, երբ մասնավորապես մարզերում բժիշկների դեֆիցիտ կա: Տիկին Վարդանյանն ասաց, որ մարզերում, իսկապես բժիշկների պակաս կա, ինչի մասին բարձրաձայնվել է նաեւ օրերս կազմակերպված առողջապահության նախարարին կից կոլեգիայի նիստում, որտեղ քննարկվել են ոլորտի խնդիրները:
Ըստ վարչության պետի. «Այսօր Հայաստանից կա մասնագետների արտահոսք, այդ արտահոսքից անմասն չեն մնում նաեւ սրտաբանները. ե’ւ վիրաբույժ ե’ւ թերապեւտ սրտաբանները: Մի մասի մոտ կա ցանկություն որոշ ժամանակ դրսում աշխատելու, գիտելիքներ ձեռք բերելու, ինտեգրվելու: Չենք կարող հերքել, որ կա նաեւ ֆինանսական կողմը, այնտեղ շատ ավելի են վաստակում: Բայց ասեմ, որ բոլոր գնացած բժիշկները չէ, որ այնտեղ բժիշկ են աշխատում»:
Ծաղիկ Վարդանյանի մեկնաբանություններն առավել մանրամասն` տեսանյութում
Ներկայացնելով սրտաբանության ոլորտի խնդիրները, տիկին Վարդանյանն ասաց, որ այսօր սրտանոթային`արյան շրջանառության համակարգի հիվանդությունները ոչ միայն Հայաստանում, այլեւ ամբողջ աշխարհում առաջնային տեղում են եւ մահացության 90 տոկոսը բաժին է ընկնում ոչ վարակիչ հիվանդություններին, որից 40 տոկոսը սրտանոթային հիվանդություններն են: Մեր երկրում տարածվածությամբ առաջին տեղում են զարկերակային բարձր ճնշմամբ հիվանդությունները: Միայն 2014 թվականին գրանցվել է սրտի իշեմիկ հիվանդության 17 հազար 97 նոր դեպք, որից 2 հազար 83-ը սրտամկանի սուր ինֆարկտ է եղել: Նշյալ տարում սրտի իշեմիկ հիվանդությունից մահացել է 8 հազար 483 մարդ, որից 2 հազար 386-ը՝ սուր ինֆարկտից:
Կարդացեք նաև
Ծաղիկ Վարդանյանն ասաց, որ նախարարությունը առաջնային պահպանման օղակում իրականացնում է մի շարք սկրինինգային ծրագրեր, որպեսզի հիվանդությունը կանխարգելի: Ըստ նրա, ավելի ճիշտ է հիվանդությունը կանխարգելել քան` բուժել. «Ամենահարուստ պետությունն անգամ չի կարող հոգալ այս հիվանդության, հիվանդանոցի բուժօգնության ծավալների ծախսերը, այդիսկ պատճառով պետք է որդեգրել առողջ պահելու քաղաքականությունը, որը առաջնային օղակում պրոֆիլակտիկ գործողությունների իրականացումն է»:
Տիկին Վարդանյանը կոչ է անում առողջ ապրելակերպ վարել. չծխել, ալկոհոլը չչարաշահել, ճարպոտ սննդից խուսափել, ֆիզիկական ակտիվություն ցուցաբերել, աղը սահմանված քանակությամբ օգտագործել. «Օրեկան 5 գրամից ավելի աղի օգտագործումը մարդու օրգանիզմում առաջացնում է ռիսկի գործոն: Եթե ունենանք առողջ ապրելակերպ, կունենանք առողջ սիրտ»:
Ըստ նրա, մարդիկ մահանում են կենսունակ տարիքում, ինչը բացասաբար է անդրադառնում երկրի տնտեսական զարգացման վրա:
Ծաղիկ Վարդանյանի տվյալներով, այս տարվա հունվարի 15-ից մեկնարկել է «Հիվանդությունների կանխարգելում եւ վերահսկում» սկրինինգային ծրագիրը, որի բաղադրիչներից մեկը 35-68 տարեկան անձանց շրջանում զարկերակային գերճնշման հայտնաբերումն է: 1-ին կիսամյակում հետազոտվել է 179 հազար քաղաքացի, նրանցից 11 տոկոսի մոտ հայտնաբերվել է զարկերակային գերճնշում:
Սրտի անհետաձգելի վիրահատությունների ծրագրով էլ բժշկական օգնություն է ստացել 1068 քաղաքացի, որից 989-ին կատարել են ստենտավորում, 79-ը քաղաքացու էլ` կորոնոգրաֆիա:
Լուսինե ԲՈՒԴԱՂՅԱՆ
