Գիտությունների ազգային ակադեմիայի Մանուկ Աբեղյանի անվան գրականության ինստիտուտում սկսվեց Հայերենագիտական միջազգային 10-րդ գիտաժողովը, որին մասնակցում են մոտ 50 հայերենագետներ` Հայաստանից և արտերկրից:
Aravot.am-ը ԿԳՆ Լեզվի պետական տեսչության պետ Սերգո Երիցյանից հետաքրքրվեց, թե ինչ խնդիրներ են ծառացած արդի հայերենի առջեւ: «Մեր հարուստ հայոց լեզուն բազմաթիվ խնդիրների ունի, որոնք առաջնահերթ կապված են բառարանագիտության հետ: Վերջին 40 տարում այդ ոլորտը ֆինանսավորման խնդիր ունի. բառարանները չեն թարմացվում, նորերը չեն կազմվում: Մինչդեռ շատ երկրներ, այդ թվում՝ հետխորհրդային, կազմում են անձնանունների, տեղանունների, անգամ՝ քաղաքների ու բնակավայրերի բառարաններ»,-ասաց Սերգո Երիցյանը՝ վկայակոչելով այդ ուղղությամբ Հրաչյա Աճառյանի հսկայական աշխատանքը, որն այսօր պետք է շարունակել:
ԼՊՏ պետի խոսքով՝ բառարանը պետք է հասանելի լինի յուրաքանչյուր ընթերցողի եւ մասնագետի: Տեսչություն այս ուղղությամբ ծրագրեր է մշակել. «Եթե ստեղծվի Լեզվի պետական կոմիտե, կարծում եմ՝ կանոնադրական առաջին քայլը այդ ծրագրերի իրականացումը կլինի: Օրինակ` Լիտվան տեղանունների եւ անձնանունների հզոր բառարան-բացատրություններ ունի, որոնք հասանելի են համացանցում»,-հավելեց Երիցյանը: Նա կարծում է, որ ժամանակն է Լիտվայի փորձով լեզվական հարստությունը տեղափոխելու համացանցային տիրույթ:
Նշենք, որ գիտաժողովն աշխատանքը կշարունակի նաեւ վաղը: Մասնակիցները զեկուցումներով կանդրադառնան լեզվի ուսումնասիրության ոլորտներին` ընդհանուր և համեմատական լեզվաբանություն, բարբառագիտություն, արդի հայերենի տեսություն:
Կարդացեք նաև
Լուիզա ՍՈՒՔԻԱՍՅԱՆ
Անգրագիտությունն ապրած կենա եւ օտար լեզուները` հատկապես անգլերենն ու ռուսերենը: Ի՞նչ հայերեն: