Ֆուտբոլի Հայաստանի ազգային հավաքականի հետ Եվրո 2016-ի ընտրական փուլի վերջին հանդիպման նախօրեին Վազգեն Սարգսյանի անվան «Հանրապետական» մարզադաշտում հրավիրված մամուլի ասուլիսում Ալբանիայի ընտրանու գլխավոր մարզիչ Ջիաննի Դե Բիազին չթաքցրեց, որ վաղն իրենք խաղալու են միայն հաղթանակի համար, որպեսզի անմիջականորեն հայտնվեն եզրափակչում:
«Երբ Եվրո 2016-ի շրջափուլից առաջ հայտարարեցի, թե մենք պետք է գնանք Ֆրանսիա, ալբանացի ժողովուրդն ինձ համարեց խենթ: Բայց այսօր մենք այնպիսի իրավիճակում ենք գտնվում, որ այնտեղ լինելու հնարավորություն ունենք: Հիմա մեզ մեկ խաղ է մնացել, որում հաղթելու դեպքում անմիջապես կհայտնվենք Եվրոպայի առաջնությունում, հակառակ դեպքում կմասնակցենք անցումային խաղերին: Երբ առաջին խաղում հանդիպեցինք Հայաստանի հավաքականին, ես տպավորված էի: Միշտ էլ ասել եմ, որ Հայաստանը լավ է խաղում: Մասնավորապես, ինձ դուր է գալիս Մխիթարյանը: Նա հզոր ֆուտբոլիստ է: Դուք լավ հավաքական ունեք:
Վաղը մեզ համար շատ խորհրդանշական եւ կարեւոր օր է, որպեսզի հաղթելով ուրախություն պարգեւենք ալբանացի ժողովրդին: Կարծում եմ, որ մեկ օր էլ Հայաստանը դրա հնարավորությունը կունենա»: Ալբանացի լրագրողի հարցին, թե վաղը հերթական խա՞ղ է լինելու, թե երազանքների, գլխավոր մարզիչը պատասխանեց. «Վաղը մի խաղ է լինելու, որում կփորձենք իրականացնել բոլոր ալբանացիների երազանքը»:
Կարդացեք նաև
Աշոտ ՀԱԿՈԲՅԱՆ