Ն. Ծաղկավանը 7 զոհ է տվել
Հոկտեմբերի 27-ին Իջեւանի տարածաշրջանի սահմանամերձ Ներքին Ծաղկավան գյուղում, միջպետական ավտոճանապարհի հարեւանությամբ օծվեց մերօրյա ազատամարտում զոհված ծաղկավանցիների հիշատակին նվիրված խաչքար: Այն կառուցվել է ՀՀ պաշտպանության նախարարության միջոցներով, հեղինակն է քանդակագործ Արմեն Ալեքսանյանը: Խաչքարի օծումը կատարվեց ձեռամբ Հայ առաքելական եկեղեցու Տավուշի թեմի առաջնորդ Բագրատ եպիսկոպոս Գալստանյանի:
Միջոցառմանը մասնակցում էին Տավուշի մարզպետի տեղակալ Լեւոն Սարգսյանը, երկրապահ կամավորականների միության Տավուշի մարզային խորհրդի նախագահ Ռուդիկ Դավթյանը, զոհված ծաղկավանցիների հարազատներ, սահմանամերձ գյուղի բնակիչներ: Չնայած տեղացող անձրեւին եւ տեղանքը ադրբեջանական դիրքերի դեմ-դիմաց գտնվելուն, միջոցառումը կայացավ հավուր պատշաճի: Ելույթ ունեցան փոխմարզպետ Լեւոն Սարգսյանը, «Մելիքգյուղ-Ծաղկավան» գրքի հեղինակ Ռուբեն Սիմոնյանը:
Կարդացեք նաև
Ն. Ծաղկավանի գյուղապետ Նաիրի Աթաբեկյանը իր խոսքում հնչեցրեց ազատամարտում զոհված ծաղկավանցիներ Դարչո Յոլչյանի,Հայկ Ռեւազյանի, Կարեն Հարությունյանի, Սամվել Գասպարյանի,Զորիկ Գեւորգյանի ,ադրբեջանական հրետակոծոթյունիզ զոհված խաղաղ բնակիչներ Աննա Թեմուրյանի եւ Հրաչիկ Աթաբեկյանի անունները:
Միջոցառումը շարունակվեց գյուղի հանդիսությունների սրահում, ուր ԵԿՄ Իջեւանի տարածաշրջանային խորհրդի նախագահ Ռ. Դավթյանը ԵԿՄ պատվոգրեր եւ հուշամեդալներ հանձնեց զոհված ծաղկավանցիների հարազատներին, սահմանամերձ Ն. Ծաղկավանի մի խումբ բնակիչների: Ներկաները բաժակ բարձրացրին զոհվածների հիշատակի համար:
Ոսկան ՍԱՐԳՍՅԱՆ
