Այսօր քաղաքաշինության նախարար Նարեկ Սարգսյանից լրագրողները հետաքրքրվեցին՝ աղետի գոտու բնակիչների բնակարանային խնդիրները ե՞րբ են լուծվելու, ո՞ւր մնաց Սերժ Սարգսյանի խոստումը:
Նարեկ Սարգսյանը պատասխանեց, որ անցյալ տարի Գյումրիում 450 ընտանիք ուներ բնակարանի խնդիր, կեսը ստացել են, մյուս կեսի հարցով էլ շարունակում են զբաղվել. «Պետությունն իր պարտավորությունը կատարում է, շուտով կառավարության որոշում կլինի երկրորդ մասին բնակարանների գնման խնդրի վերաբերյալ»:
Նարեկ Սարգսյանը հիշեցրեց, որ ինքն էլ էր խոստացել՝ մինչեւ 2016-ը ավարտել քաղաքային բնակվայրերում, մինչեւ 2017-ը՝ աղետի գոտու գյուղական բնակավայրերում երկրաշարժից տուժած, շահառու հաշվառված ընտանիքների բնակարանների խնդիրն ամբողջությամբ կլուծվի»:
Լրագրողների դիտարկմանը, որ հազարավոր ընտանիքներ բնակարաններ չունեն աղետի գոտում, իսկ պետությունն ասես ձեռքերը լվանում է՝ նախարարը պատասխանեց. «Պետությունը հաշվառել է մինչեւ 2008-ը աղետի գոտու մնացած բնակարանները, մինչեւ այսօր 20 հազար բնակարան է տվել, բազմաթիվ շենքեր են կառուցվել: Մոտ 4500 ընտանիքների խնդիր է մնացել լուծել, Մուշ թաղամասում նրանցից մնացել է ընդամենը 230 ընտանիք»:
Կարդացեք նաև
Նա վստահեցրեց, որ Սերժ Սարգսյանի խոստումները կատարվել են:
Հարցին՝ Մարզահամերգային համալիրն ինչ ճակատագիր կունենա՝ նախարարը պատասխանեց. «Ինֆորմացիա չունեմ, էնքան գիտեմ, ինչքան կառավարության որոշման մեջ կա: Ծրագիրը կքննարկվի, հեղինակներն անպայման կմասնակցեն, կարող եմ երաշխավորել եւ կարող եմ երաշխավորել, որ շենքի ճարտարապետական տեսքի հետ կապված խնդիրներ չեն կարող լինել: Միջամտություն շենքին եւ շենքի դեֆորմացիա ուղղակի չի կարող լինել, քաղշինը չի թույլատրի նման բան: Երբ լինի, ծրագիր ներկայացվի, ծրագրին անպայման կմասնակցեն հեղինակները, երբ կներկայացնեն՝ կքննարկենք: Կառավարության որոշումից հետո ես չունեմ տեղեկատվություն, որ ներկայացված է կամ նախարարություն, կա՛մ քաղաքապետարան: Պետք է սկզբից ներկայացնեն քաղաքապետարան: Էսքիզային պրոյեկտ, թե որտեղ ինչ են ուզում անել՝ այս պահին չկա նման բան»:
Հռիփսիմե ՋԵԲԵՋՅԱՆ
