Մշակույթի նախարարության Հովհ. Շարամբեյանի անվան ժողովրդական ստեղծագործության կենտրոնում այսօր բացվեց երիտասարդ քանդակագործ, նկարիչ, տեղական ու միջազգային մրցույթների դափնեկիր Արման Համբարձումյանի անհատական ցուցահանդեսը: 20-ից ավելի քանդակներ և գրաֆիկական աշխատանքներ ներառող ցուցահանդեսը կրում է «Առասպելներ» խորագիրը:
«Ստեղծագործելիս ուսումնասիրել եմ տարբեր առասպելներ եւ ժամանակակից ստեղծագործություններ, որոնց միախառնումից էլ ծնվել են այս քանդակները: Վերարտադրել եմ որոշ կերպարներ, նաեւ ինքս եմ ստեղծել առասպելական կերպարներ»,- Aravot.am-ի հետ զրույցում ասաց հեղինակը:
Նրա ստեղծագործություններն էքսպրեսիոնիզմի, աբստրակցիայի եւ սյուռեալիզմի միաձուլում են՝ կերտված կերամիկայից, բրոնզից, կավից, պղնձից եւ քարից: «Աշխատանքս ժամանակ եւ համբերություն է պահանջում, առանձնահատուկ է նրանով, որ այդ նյութերը պետք է համադրել: Մեկ քանդակի վրա աշխատում եմ մեկ ամիս եւ ավելի»,- նշեց Արման Համբարձումյանը:
Կարդացեք նաև
Նա տեղեկացրեց, որ Մալթայում, Սերբիայում, Մոլդովայում, Ռուսաստանում, Հունաստանում մասնակցել է ցուցահանդեսների. «Օտարերկրացի արվեստասերները նույնպես շատ են հավանում աշխատանքներս եւ հասկանում են՝ այն, ինչ անում եմ, պիտանի է մարդկությանը»:
Հավելենք, որ երիտասարդ արվեստագետի յուրօրինակ քանդակների ցուցահանդեսը բաց կլինի մինչեւ դեկտեմբերի 17-ը:
Լուիզա ՍՈՒՔԻԱՍՅԱՆ
