Այսօր Հայաստանի ամերիկյան համալսարանի և Ճարտարապետության և շինարարության Հայաստանի ազգային համալսարանի միջև կնքվեց կրթության ու գիտահետազոտության ոլորտներում համագործակցության հուշագիր:
Հայաստանի ամերիկյան համալսարանի նախագահ Արմեն Տեր Կյուրեղյանի և Ճարտարապետության և շինարարության Հայաստանի ազգային համալսարանի ռեկտոր Գագիկ Գալստյանի կողմից եռամյա փոխըմբռնման հուշագրի ստորագրումից հետո կողմերը ներկայացրեցին այն բոլոր ոլորտները, որտեղ կծավալեն համատեղ գործունեություն:
Լինելով շինարար-ինժեներ՝ Արմեն Տեր-Կյուրեղյանը խոստովանեց, որ հայաստանյան բուհերից Ճարտարապետության և շինարարության Հայաստանի ազգային համալսարանն իր սրտին ամենամոտն է և վստահություն հայտնեց, որ այս հուշագրով երկու բուհերի համագործակցության շրջանակն ավելի կմեծանա. «Մենք ուրախ ենք, որ ստորագրեինք փոխհամաձայնության հուշագիր: Չնայած, մեր համալսարանը չունի ճարտարապետության կամ շինարարության ոլորտի մասնագետներ, սակայն ես համագործակցության բազմակողմանի հնարավորություններ եմ տեսնում: Լինելով ինքս շինարար-ինժեներ պատրաստ եմ իմ հնարավոր ներդրումը ունենալ այս համաձայնագրի շրջանակներում»,- նշեց ՀԱՀ նախագահ Արմեն Տեր-Կյուրեղյանը: Բանավոր զրույցի, հարց ու պատասխանի հարթության վրա ձեռք բերված պայմանավորվածությունները տեղափոխվեցին այլ հարթություն և վավերացվեցին կարմիր կնիքով. հաստատուն փոխգործակցության սկիզբը դրված է:
Հուշագրի դրույթների շրջանակում՝ երկկողմանի շահերից ելնելով, երկու բարձրագույն ուսումնական հաստատությունները համատեղ կիրականացնեն գիտաժողովներ, սեմինարներ, նորագույն տեխնոլոգիաների կիրառմամբ հետազոտական աշխատանքներ, կմշակեն ուսումնական ու կրթական նոր ծրագրեր, ինչպես նաև, միջոցների առկայության դեպքում, ՃՇՀԱՀ-ի դասախոսների, ուսանողների և վարչակազմի անդամների համար Ամերիկյան համալսարանի կողմից կկազմակերպվեն անգլերենի խորացված դասընթացներ:
Կարդացեք նաև
Հայաստանի ամերիկյան համալսարանի մամուլի հաղորդագրություն
