Aravot.am-ը Գյումրիում ծնված ՀՀ վաստակավոր նկարիչ Արարատ Սարգսյանից հետաքրքրվեց՝ ի՞նչ կարծիք ունի դեկտեմբերի 7-ին Սպիտակում տեղադրված սլավոնական դիմագծերով, 3,5 մետր բարձրությամբ բրոնզաձույլ «Խորհրդային զինվոր» արձանի մասին:
Արարատ Սարգսյան
«Դա սովետական զինվորի հուշարձան չէ, ռուսական զինվորի հուշարձան է, իսկ այն ժամանակ երկրաշարժից տուժածներին օգնողների մեջ կային ոչ միայն ռուսներ, այլեւ ուզբեկներ, էստոնացիներ… 15 ազգ: Այսինքն` արդեն սխալ կա: Իսկ կատարողական տեսակետից՝ այն սովորական սովետական արձան է, արվեստի ոչ մի բան չի կրում իր մեջ: Միջին գրագիտության, սովետական ակադեմիա ավարտած քանդակագործի կամ քանդակագործների արած արձան է, այնպիսի արձան, որոնցով ամբողջ Սովետի տարածքն ու ամբողջ Ռուսաստանը լիքն են»,- ասաց արվեստագետը:
Իսկ իմաստ ունե՞ր հիմա նման արձան տեղադրելը Հայաստանում:
Ի պատասխան մեր այս հարցի Արարատ Սարգսյանն ասաց. «Ես երկրաշարժի օրերին այնտեղ եմ եղել: Տեսել եմ, որ ոչ միայն ռուսներ, այլեւ ամբողջ աշխարհից տարբեր ազգերի ներկայացուցիչներ կային: Եթե դնում էին հուշարձան, իրականում պետք է սովետական զինվորի հուշարձանը դնեին, թե չէ ի՞նչ է նշանակում ռուս զինվորինը դնել»:
Կարդացեք նաև
Արվեստագետի ձեւակերպմամբ, այդ արձանը դնելու մեջ ռուսներին դուր գալու միտում կա, մինչդեռ կարեւորը ճշմարտությունն է. «Իսկ ճիշտն այն էր, որ այն ժամանակ սովետական երկիր էր, զինվորներն էլ տարբեր ազգերից էին»:
Գոհար ՀԱԿՈԲՅԱՆ
