Երեկ զանգահարեցինք Շուշանիկ Բախշյանին։ Վերջինս հարցին ի պատասխան ասաց, որ փորձում է կազդուրվել։ Մեղադրանքի հետ կապված հարցին Բախշյանը, սակայն, չպատասխանեց, նա հարցը դեռ չլսած՝ անջատեց լսափողը։
Սույն գործով տուժողների իրավահաջորդի ներկայացուցիչ Մարինե Թովմասյանն էլ երեկ ասաց, որ, ցավոք, դատարանի որոշումը տուժող կողմը բողոքարկելու հնարավորություն չունի, եթե ունենար, ապա կբողոքարկեին։ Փաստաբանը նաեւ պատասխանեց մի քանի հարցերին:
– Դուք նաեւ նշում էիք, որ այս գործով մեղադրյալների շրջանակը պետք է ընդլայնվի։
– Ես դեռեւս Շուշանիկ Բախշյանին մեղադրանք առաջադրելուց առաջ էի նման հայտարարություն թույլ տվել։ Այստեղ մենակ Շուշանիկի պատասխանատվության հարցը չի, նա ընդամենը որպես բժիշկ իր գործառույթները պատշաճ չի իրականացրել, բայց պարզ է դառնում, որ Մերի Մարգարյանը այնպիսի աշխատանքային օրերին է դիմել, որ Շուշանիկը հիվանդանոցում չի եղել, այսինքն, եթե նա այնտեղ չէ, ուրեմն վե՞րջ, էլ բժշկական օգնություն չպե՞տք է ցուցաբերվեր։
Կարդացեք նաև
Մենք հարց ենք դնում՝ կոնկրետ այդ օրերի հերթապահ բժիշկների գործողությունները որքանո՞վ է իրավաչափ, բացի այս, նաեւ հարցը դրվում է բաժնի վարիչի մասով, թե նման իրավիճակներում, երբ որ կրիտիկական հարց է դրվում՝ ծննդալուծում պե՞տք է արվի, թե՞ չպետք է արվի, ի վերջո, վերջնական որոշումը ո՞վ պետք է կայացնի, չէ՞ որ բաժնի վարիչ կա։
– Շուշանիկ Բախշյանը շարունակում է աշխատել «Շենգավիթ» բժշկական կենտրոնում։ Տուժող կողմը դիմելո՞ւ է, որ նրա մասնագիտական գործունեությունը կասեցվի մինչեւ քննության ավարտը։
– Քանի որ նրա կարգավիճակը մինչ մեղադրանք առաջադրելը վկայի էր, մենք որեւէ միջոց չէինք ձեռնարկում, թեեւ հարազատների կողմից դժգոհություն կար։ Այս պահին, կարծում եմ, Առողջապահության նախարարը պետք է ձեռնարկի միջոցներ, որովհետեւ հրապարակավ առկա է տեղեկատվություն, որ Շուշանիկ Բախշյանը ունի մեղադրյալի կարգավիճակ։ Նախարարը գիտի, որ անձ է շարունակում աշխատել, որի անմիջական մեղավորության հարցը դեոեւս քննության առաջ է կանգնած, եւ դեռ պարզ չէ, թե հետագայում ինչ որոշում կկայացվի։
Մենք դեռ սպասում ենք, որ քննչական մարմինները որեւէ գործողություններ ձեռնարկեն, եթե ոչ, ապա տուժող կողմը միանշանակ դիմելու է Առողջապահության նախարարին, որպեսզի մինչեւ քննության ավարտը արգելվի Բախշյանին իր բնագավառում գործունեություն իրականացնել։
Տաթեւ ԽԱՉԱՏՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում