«Լավ է, որ ԵԽԽՎ պատգամավորները թույլ չտվեցին գոնե Ուոլթերի բանաձեւն անցնի: Այսինքն՝ պատգամավորները քվեարկեցին խաղաղ գործընթացի օգտին»,- այս մասին այսօր լրագրողների հետ հանդիպմանն, անդրադառնալով Եվրոպայի խորհրդի խորհրդարանական վեհաժողովում հակահայկական զեկույցների քվեարկությանն, ասաց ՀՀ արտաքին գործերի նախարար Էդվարդ Նալբանդյանը:
Խոսելով Սարսանգի ջրամբարի զեկույցի մասին՝ ԱԳ նախարարը նշեց, որ այն կրում էր տեխնիկական բնույթ եւ այդ պատճառով քննարկվում էր ոչ թե քաղաքական հարցերի հանձնաժողովում, այլ՝ սոցիալականում: «Զեկուցողը փորձել էր որոշ քաղաքական ձեւակերպումներ մտցնել բանաձեւի մեջ: Ինչքանով է ընդունելի այս բանաձեւը, եթե զեկուցողն անգամ չի այցելել Սարսանգի ջրամբար, թողնենք նրանց, ովքեր քվեարկեցին այս բանաձեւի օգտին»:
Ըստ Նալբանդյանի՝ ոչ թե Հայաստանն, այլ Ադրբեջանն է ասում, որ ԵԽԽՎ-ի կողմից ընդունված բանաձեւերը թղթի կտոր են. «Ամենաբարձր մակարդակով են ասել դա: Մենք չենք ասում այդպիսի բան, բայց դրա հետ մեկտեղ պետք չէ ուռճացնել, չափազանցնել այդ կարգի բանաձեւերի նշանակությունը»:
Աշոտ ԻՍՐԱԵԼՅԱՆ