«Մենք գիտեինք, թե Մարգար Եսայանը ինչպես է քվեարկելու»,- փետրվարի 2-ին լրագրողների հետ հանդիպման ընթացքում, անդրադառնալով ԵԽԽՎ-ում հակահայկական զեկույցի քվեարկությանը, ասաց ԱԺ պատգամավոր Արագած Ախոյանը:
Նա հունվարի 10-13-ը այցելել է Թուրքիայի մայրաքաղաք Անկարա՝ հայ պատգամավորների հետ հանդիպելու նպատակով. «Ունենք հրաշալի հայեր Գարո Պալյանի եւ Սելինա Դողանի դեմքով, եւ ցավոք սրտի, նույն բանը չեմ կարող ասել Մարգար Եսայանի մասին: Բայց մոռանանք Մարգար Եսայանին, որովհետեւ ինչպես Գարեգին Նժդեհն էր ասում՝ վտանգավորը թուրքը չէ, վտանգավորը թուրքացած հայերն են, որովհետեւ այս պարագայում սա ասված էր հենց Մարգար Եսայանի համար»:
Արագած Ախոյանը համարում է, որ այն հանգամանքը, որ հակահայկական զեկույցի քվեարկությանը չեն մասնակցել Թուրքիայի պատվիրակության 3 անդամները, լուրջ խնդիրներ է առաջացրել թուրք-ադրբեջանական հարաբերություններում. «Շատերը հասկացել են, որ չի կարելի հայ-թուրքական հարաբերությունները կապել Ադրբեջանի հետ»:
Կարդացեք նաև
Անդրադառնալով Մարգար Եսայանին՝ Արագած Ախոյանը միակ պատգամավորն է, որը հետաքրքրվել է, թե հակահայկական զեկույցին դեմ քվեարկելու դիմաց ի՞նչ կստանա. «Բազառ արեց, կոպիտ ասած: Ես զգուշացրեցի, ասացի՝ Մարգար, եթե ձեր կուսակցությունը ահռելի գումարներ է ծախսում, որպեսզի Ձեր վարկանիշը բարձրացնի Թուրքիայում հայության շրջանում, ապա Ձեր գործողությամբ այն ուղղակի 0-ի եք հավասարեցնում: Եվ դրա մասին ես իրեն նախօրոք զգուշացրեցի, ինչը տեղի ունեցավ: Այսօր Թուրքիայում՝ հայության շրջանում, Մարգար Եսայանի վարկանիշը իջել է 0-ի»:
Պատասխանելով Aravot.am-ի հարցին, Արագած Ախոյանը ասաց, որ քվեարկությունից հետո միջադեպ է եղել՝ հայ պատգամավորները «շատ դաժան իր տեղը ցույց են տվել». «Ինքը շատ սարսափած եւ ազդված է եղել, ես իր մեջ հայի ոչ մի նշույլ չտեսա, հայերեն խոսում է, բայց ոչ մի նշույլ չտեսա, որ կարող է պիտանի լինել իր ազգին: Միգուցե կարող է պիտանի լինել իր հայրենիքին, բայց իր ազգին՝ ոչ»:
Ամի ՉԻՉԱԿՅԱՆ
