Նախագահ Սերժ Սարգսյանի խոսնակն այսօր անդրադարձել է ԵԱՀԿ/ԺՄԻԳ-ի փորձագիտական խմբի հնչեցրած քննադատություններին՝ նշելով, թե նախագահականի պաշտոնյաների մասնակցությունը «Այո»-ի քարոզարշավին չի հակասում օրենքին:
ԵԱՀԿ-ի դիտորդները սահմանադրական հանրաքվեի վերաբերյալ իրենց վերջնական զեկույցում քննադատել էին պաշտոնյաների ներգրավվածությունը քարոզարշավում: Հիշեցնելով, որ հանրաքվեից ամիսներ առաջ օրենքում կատարվեցին փոփոխություններ՝ հնարավորություն տալով քաղաքական ու հայեցողական պաշտոն զբաղեցնողներին քարոզչություն իրականացնել, զեկույցն ընդգծում է.- «Հանրաքվեի ընթացքում իշխանությունները «Այո» քարոզարշավի համար խոշոր հանրային միջոցներ մոբիլիզացրեցին. «Այո» նախընտրական շտաբերը ղեկավարվում էին վարչապետի կողմից, և նախագահի աշխատակազմի ղեկավարը, ՀՀ տարածքային կառավարման և արտակարգ իրավիճակների նախարարը, Վերահսկիչ պալատի և ՀՀ նախագահի վերահսկողական ծառայության ղեկավարները ներգրավված էին քարոզչության մեջ»։
Փաստելով, որ այս բոլոր պաշտոնյաները վարձատրվում են պետական և տեղական բյուջեից, զեկույցը նշում է.- «Նրանք զգալի հանրային միջոցներ են օգտագործել «Այո» քարոզարշավի ընթացքում՝ դրանով իսկ մարտահրավեր նետելով ԵԱՀԿ-ի և այլ միջազգային կառույցների առջև ստանձնած պարտավորություններին»։
Նախագահ Սերժ Սարգսյանի խոսնակ Վլադիմիր Հակոբյանը, պատասխանելով «Ազատության» հարցին, հայտնեց.- «Հայաստանի Հանրապետության ընտրական գործընթացներում Հայաստանի նախագահի աշխատակազմի ղեկավարի և վերահսկողական ծառայության պետի ներգրավվածությունը որևէ կերպ չի հակասում գործող օրենսդրությանը: Վիգեն Սարգսյանը և Հովհաննես Հովսեփյանը 2015թ. սահմանադրական բարեփոխումների քարոզարշավի ընթացքում «Այո» նախընտրական շտաբի աշխատանքներին մասնակցել են աշխատանքից ազատ ժամերին, և նրանց կողմից հանրային միջոցներ չեն օգտագործվել»,- ասված է նախագահ Սերժ Սարգսյանի խոսնակի պարզաբանման մեջ:
Կարդացեք նաև
Ռուզաննա Ստեփանյան
Նյութի մանրամասները կարդացեք «Ազատություն» ռադիոկայանի կայքում
