«Դատարկ, ոչինչ չասող ճամարտակություններ, մարդու կողմից, ով խոսում է ժողովրդավարական ազատ եւ արդար ընտրությունների մասին, այն բանից հետո, երբ երկու ամիս առաջ ինքն է ահաբեկել ժողովրդին` պարտադրելով իր կամքը»,- այսպես է բնութագրում ՀԱԿ խորհրդարանական խմբակցության ղեկավար Լեւոն Զուրաբյանը փետրվարի 12-ին նախագահ Սերժ Սարգսյանի ելույթը`սահմանադրական բարեփոխումների առիթով:
«Որեւէ նոր գաղափար չկար, դա անօգնականության մասին ելույթ էր: Ոչ մի կոնկրետ ծրագիր, առաջարկ, չկար»,- «Փաստարկ» մամուլի ակումբում հայտարարեց ընդդիմադիր գործիչը:
Հակադարձելով լրագրողի դիտարկմանը, որ ՀՀԿ-ականները այն գնահատեցին շատ կարեւոր, խորիմաստ ելույթ, Լեւոն Զուրաբյանն ասաց. «Իսկ դուք այլ բա՞ն էիք սպասում»:
Նա մի փոքրիկ «վերլուծություն» արեց Սերժ Սարգսյանի ելույթի արտաքին քաղաքականության մասով. «Թուրքիան եւ Ադրբեջանը անանցանելի ճահիճ է համարում մարդն, ով մի քանի տարի առաջ նախաձեռնել է ցյուրիխյան ուրացումը`ուրանալով ցեղասպանությունը»:
Կարդացեք նաև
Հիշեցնենք, ՀԱԿ-ը`Լեւոն Տեր-Պետրոսյանի գլխավորությամբ, կողմ էր Սերժ Սարգսյանի նախաձեռնած հայ-թուրքական հարաբերությունների հաշտեցման գործընթացին` բացառությամբ պատմաբանների հանձնաժողով ստեղծելու կետի: Լեւոն Տեր-Պետրոսյանը ռուսական պարբերականներից մեկին տված հարցազրույցում այս առնչությամբ նաեւ ասել էր, թե Սերժ Սարգսյանն ամեն ինչ ճիշտ է արել:
Նելլի ԳՐԻԳՈՐՅԱՆ
