Լեզվաբան Լավրենտի Միրզոյանն այսօր «Հենարան» ակումբում կազմակերպված ասուլիսին բերել էր մի շարք պետական ու մասնավոր մարմինների եւ ծառայությունների փաստաթղթեր, որոնցում շատ լեզվական սխալներ կան, անգամ կետադրությունն է բացակայում:
Լեզվաբանը դժգոհեց, որ խնդիրը գրեթե բոլոր ոլորտներին է վերաբերում. «Այսօր մայրենի լեզուն օտարվում է եւ դառնում երկրորդ լեզու: Կան բուհեր, որտեղ հայոց լեզվի ամբիոնները միացվում են օտար լեզուների ամբիոններին: Դժգոհ ենք ԱԺ պատգամավորների խոսքից, գովազդի լեզվից: Նորակառույց հյուրանոցների վրա հայերեն անուններ չկան: Շատանում են «հոթելներն» ու «մոթելները»:
Պարոն Միրզոյանը նշեց, որ ուսանողների եւ երեխաների խոսքը եւս մաքուր չէ, իսկ արեւմտահայերենը ՅՈՒՆԵՍԿՕ-ի կողմից ներառված է վտանգված լեզուների ցանկում. «Պարտավոր ենք այս ահազանգը լուրջ ընդունել ու մտածել կոնկրետ քայլերի մասին: Աշխարհում տարեկան չորս փոքր ժողովուրդների լեզուներ վերանում են: Ո՞վ է զբաղվելու հայապահպանության խնդրով: Պետք չէ մտածել, թե դա միայն Սփյուռքի եւ Մշակույթի նախարարությունների խնդիրն է: Ամեն ինչ հնարավոր է կարգավորել օրենքով: Նոր Սահմանադրությունում երեք հոդված նվիրված է մայրենի լեզվին: Դրանցից մեկում ասվում է, որ հայոց լեզուն գտնվում է պետության պաշտպանության ներքո»:
Կարդացեք նաև
Ինչ վերաբերում է հեռուստաեթերի լեզվին, Միրզոյանն ասաց, որ այսօր այն բավականին մաքուր է. «Մտահոգություններ ունենք կայքերի հետ կապված: Շտապողականության խնդիր կա, վրիպումներ են լինում: Կարծում եմ՝ դա էլ ժամանակի հարց է»:
Լուիզա ՍՈՒՔԻԱՍՅԱՆ
