Հին չինական բնափիլիսոփայության մեջ «ինը» եւ «յանը» հակադրությունների՝ սեւի ու սպիտակի, կոշտի եւ փափուկի, խավարի ու լույսի, լուսնի եւ արեւի, երկրի ու երկնքի, սառի ու տաքի եւ այլոց տարբերություններն ընդգծող արտահայտչամիջոց էին: Հակադիր բեւեռներ, որոնք միմյանց փոխլրացնում եւ ներդաշնակեցնում են, ճիշտն այնպես, ինչպես՝ կինն ու տղամարդը: Փոխլրացնող հակադրությունների չինական սիմվոլիկան իր հանճարեղ պարզությամբ գրավել է ոչ միայն արվեստի մարդկանց, այլեւ՝ խոհարարների ուշադրությունը: Այս պարզագույն ապուրը այդ ուշադրության արդյունքներից մեկն է:
Անհրաժեշտ մթերքները
Ծաղկակաղամբ-0,5 կգ
Բրոկոլի- 0,5 կգ
Կարդացեք նաև
Սոխ-2 հատ
Սխտոր- 4 պճեղ
Սպանախ (ըստ ցանկության)- 1 կապ
Նեխուրի արմատ կամ կարտոֆիլ (ըստ ցանկության)- 100-200 գրամի չափ
Ձիթապտղի յուղ կամ կարագ- 2 ճաշի գդալ
Աղ- ըստ ճաշակի
Պատրաստման եղանակը
Այս ապուրը, ըստ էության, ծաղկակաղամբով եւ բրոկոլիով ապուր-պյուրեների միավորում է: Բնականաբար, նույն բաղադրատոմսով կարող եք պատրաստել նաեւ միայն բրոկոլիով կամ միայն ծաղկակաղամբով ապուր-պյուրե: Եթե կարագի փոխարեն բուսական յուղ ավելացնեք, այն պահքին հարմար ճաշատեսակ կդառնա:
Ծաղկակաղամբը եւ բրոկոլին բաժանեք «ծաղիկների»: Ցողունային հատվածը կեղեւահանեք, քանի որ կեղեւը շատ կոպիտ է: Լվացեք, ջրքամեք: Կաթսաներից մեկի մեջ լցրեք ծաղկակաղամբը, մյուսի մեջ՝ բրոկոլին, յուրաքանչյուր կաթսայում ավելացրեք հավասար քանակի սոխ եւ սխտոր:
Ծաղկակաղամբի հետ կարող եք ավելացնել նաեւ մեկ կարտոֆիլ կամ մի կտոր նեխուրի արմատ: Դրանք հավելյալ համ կտան ապուրին, սակայն գույնի վրա չեն ազդի: Եռացրած ջուր լցրեք վրան այնքան, որ ծածկի, կափարիչով ամուր փակեք եւ դրեք կրակին՝ 15 րոպեով: Բրոկոլիին եփելուց 10 րոպե անց կարող եք ավելացնել մեկ կապ մաքրած եւ լավ լվացած սպանախ՝ կանաչ գույնն ավելի արտահայտիչ կդառնա: Սպանախը շատ արագ է եփվում, այնպես որ բրոկոլին եւ ծաղկակաղամբը միասին կարող եք անջատել: Անջատելուց հետո թողեք 5-6 րոպե մնա կաթսայում, փակ կափարիչով, որպեսզի ավելի փափկի, որից հետո ապուրները լցրեք էլեկտրական խառնիչի մեջ եւ լավ խառնեք՝ առանձին-առանձին: Կամ կարող եք օգտագործել ձեռքի խառնիչը:
Վերջ: Ըստ էության պատրաստ է: Մնում է ավելացնել բուսական յուղը կամ կարագը:
Մատուցեք ափսեի մեջ՝ ձեւավորելով ին-յանի խորհրդանիշը: Ապուրամանի մեջ կողք-կողքի լցրեք մեկական շերեփ ծաղկակաղամբի եւ բրոկոլիի ապուր-պյուրե, գդալով համապատասխան տեսք տվեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
«յին-յանկ»-ի (yin yang) նշանը,
որու պատկերն է այս հետաքրքրական ապուրը՝
https://garlandvalley.com/wp-content/uploads/2013/08/Yin-Yang.jpg