Այսօր Էրեբունի եւ Նուբարաշեն վարչական շրջանների ընդհանուր իրավասության դատարանում «օֆշորի գործով» դատական նիստին ամբաստանյալ Աշոտ Սուքիասյանն ու նրա պաշտպանը՝ Յուրիկ Խաչատրյանը մի տեսանյութ ներկայացրեցին:
Տեսանյութը մեկնաբանելիս՝ Աշոտ Սուքիասյանն ասում էր, տեսեք ինչ հանքեր են, տեխնիկա է աշխատում, Հայրապետյանն ասում է՝ Աֆրիկայում բան չկա: Տուժած գործարար Փայլակ Հայրապետյանը տեղից արձագանքեց. «Աֆրիկայում շա՜տ բան կա, բայց դա քո հետ ի՞նչ կապ ունի»:
Տեսանյութերի վրա նշված էր՝ 2008 թվական: Դատավոր Վարդան Գրիգորյանը հարցրեց՝ վարկը ե՞րբ եք վերցրել՝ 2010-ին, բա 2008-ը այս գործի հետ ի՞նչ կապ ունի: Պաշտպանը պատասխանեց, որ դրանցով ապացուցում են՝ Աշոտ Սուքիասյանը մինչեւ Հայրապետյանին հանդիպելը բավականին մեծ գործարար է եղել, հենց հանքերի բիզնեսով է զբաղվել, այնպես չէ, որ խաբեության համար ժողովի ժամանակ կեղծ ներկայացրել է, թե իբր նման գործերով է զբաղվում:
Կարդացեք նաև
Աշոտ Սուքիասյանի խոսքերով՝ «Հայրապետյանն ասում էր՝ Աֆրիկայում ոչ մի հանք էլ չի եղել, ոչ մի տեխնիկա չի տեղափոխվել, առուներ են այնտեղ եղել փոքր, այդ տեղեկություններն այս տեսանյութով հերքվում են»:
Լուսանկարներից մեկում մի սեղանի շուրջ հավաքված մարդիկ էին, սեղանի վերեւում՝ Աշոտ Սուքիասյանը: Այս նկարը մեկնաբանելիս Սուքիասյանն ասաց, թե՝ ժողով ենք անում, սեղանի գլխին ես եմ նստած, այսինքն՝ սեփականատերը, գլխավորն ինքն է:
Հայրապետյանի ներկայացուցիչ Շալիկո Փիրուզյանի խոսքերով՝ «Եթե խոսակցություն լիներ, որ սա Աշոտ Սուքիասյանի սեփականությունն է, ասեին, որ այսքան բաժնետեր է, մենք այսքան բաժնեմաս ունենք՝ թերեւս, կարելի էր մտածել: Ինչո՞վ համոզվենք, որ ինչ ցուցադրվեց՝ այդ ամբողջը Աշոտ Սուքիասյանի սեփականությունն է: Ոսկիներ ցուցադրվեց, ինչո՞վ համոզվենք, որ դա իրենն էր: Սա ընդհանրապես կապ չունի քրգործի հետ, պետք է ապացույց չդիտել դա եւ չպետք է կցել քրգործին»:
Մեղադրող դատախազն էլ ասաց, որ մեղադրանքի հետ տեսանյութը կապ չունի, բայց չի էլ առարկում, որ այն ապացույց դիտվի:
Դատավորն էլ հեգնեց Սուքիասյանին. «Եթե սեղանի գլխին նստած է, դա նշանակում է սեփականատե՞ր ա: Ուրեմն ցանկացած թամադա կարող է սեփականատեր համարվել»:
Պաշտպանը պատասխանեց. «Պահակին ամեն դեպքում չէին նստեցնի սեղանի գլխին»:
Դատավորը հայտարարեց, որ այդ տեսաձայնագրությունը կցում է քրգործին, իսկ դա ապացույց ճանաչելու կամ չճանաչելու հարցին կանդրադառնա դատական ակտում:
Հռիփսիմե ՋԵԲԵՋՅԱՆ