Հայաստանը մարտի 21-ին երկրորդ անգամ կմիանա Goût de France` «Ֆրանսիայի համը» միջոցառմանը, որի ընթացքում կներկայացվեն ֆրանսիական խոհանոցի կերակրատեսակները: Միջոցառմանն այս տարի կմասնակցեն 5 մայրցամաքների 1000 ավագ խոհարարներ: Հայաստանում Ֆրանսիայի դեսպանությունում այդ օրը կկազմակերպվի ընթրիք: Միջոցառմանը կմիանան հայաստանյան 7 ռեստորաններ` ֆրանսիական ճաշացանկով: «Աշխարհի այլ երկրներում գրեթե նույն ժամին մեր դեսպանատները եւ հյուպատոսությունների ներկայացուցիչները հավաքվում են ավանդական ընթրիքի շուրջ: Հայաստանյան ընթրիքին կմասնակցեն պաշտոնատար անձինք, իսկ հաջորդ օրերի ընթացքում ռեստորաններն իրենց հաճախորդներին կառաջարկեն ֆրանսիական խոհանոցի ուտեստներ»,-այսօր Ֆրանսիայի դեսպանատանը տեղի ունեցած մամուլի ասուլիսին ասաց դեսպան Ժան-Ֆրանսուա Շարպանտիեն:
Ֆրանսիայի դեսպանության խոհարար Նիկոլա Նատալինին տեղեկացրեց, որ միջոցառումն իրականում 100-ամյա պատմություն ունի. միայն 1912-1914թթ. դրան մասնակցել են 147 երկրներ` ընդունելով ավելի քան 10.000 հյուրերի: The Club ռեստորանի ավագ խոհարար Անահիտ Սարգսյանը նշեց, որ «Ֆրանսիայի համի» շրջանակում մատուցելու են մակարոն` վանիլային պաղպաղակով եւ տավարով «Հարիսա», որը, խոհարարի բնորոշմամբ, արտակարգ համ ունի:
Charles ռեստորանի ավագ խոհարար Էդգար Եգանյանն էլ տեղեկացրեց, որ տեւական ժամանակ է` համադրում են ֆրանսիական եւ հայկական ուտեստները. «Կպատրաստենք գառի փափկամսից եւ բանջարեղենից ուտեստ` համեմված կանաչեղենով, նաեւ հայկական փախլավա»:
Կարդացեք նաև
Artbridge ռեստորանի ավագ խոհարար Մարգարիտ Պետրոսյանն էլ պատրաստելու է «Սոխով տոլմա» եւ մանդարինի թխվածք:
«Մարիոթ» հյուրանոցի ավագ խոհարար Ռոլֆ Գրաբերը նկատեց, որ աշխարհի ամենաճանաչված խոհարարները ֆրանսիացիներ են. «Պատրաստման ընթացքում եփելու տարբեր մոտեցումներ կան, որոնցով էլ պայմանավորված է ֆրանսիական խոհանոցի համբավը: Միջոցառման հիմնական ուտեստը կլինեն «Սիգ» ձուկը, կավե ամանով մատուցվող ճագարի միսը, խնձորի սառնանուշը` խնձորից եւ կարմիր ճակնդեղից: Կներկայացնենք նաեւ ֆրանսիական պանիրների տեսականի»:
Լրագրողները դեսպան Շարպանտիեից հետաքրքրվեցին, թե հայկական խոհանոցից ո՞րն է նրա սիրելի ուտեստը. «Մի քանի կերակրատեսակներ կան, որ շատ եմ սիրում, բայց ավելի շատ` «սպաս»` թանապուր: Շատ եմ սիրում նաեւ միսը մանղալի վրա խորովելու տեխնիկան»: Ակնարկին, թե «քաշած» օղի չէ՞ք փորձել, դեսպանը ժպտալով ասաց, որ նման բան իրեն երբեւէ չեն առաջարկել. «Գինիներ համտեսում եմ, բայց թունդ ալկոհոլային խմիչքների սիրահար չեմ»:
Լուիզա ՍՈՒՔԻԱՍՅԱՆ
