«Ես Հայաստանի օգտին չեմ լրտեսել և շարունակելու եմ պահանջել, որպեսզի դատարանն ինձ արդարացնի»․ – սա էր այն առաջին հայտարարությունը, որ հնչեցրեց ադրբեջանցի լրագրող, «Զերկալո» օրաթերթի նախկին թղթակից Ռաուֆ Միրկադիրովը գրեթե երկու տարի բանտում անցկացնելուց հետո: Նրա ազատ արձակումը հնարավոր դարձավ Բաքվի վերաքննիչ դատարանի այսօր կեսօրին կայացրած վճռի շնորհիվ, որի համաձայն, Միրկադիրովի՝ վեց տարվա ազատազրկման դատավճիռը փոխարինվեց պայմանական պատժաչափով` հնգամյա փորձաշրջանով հանդերձ:
«Իմ ձերբակալության պահից սկսած ես նույնն եմ կրկնել` որ մեղավոր չեմ: Թե՛ նախաքննության և թե՛ դատավարության ընթացքում այդպես էլ որևէ լուրջ ապացույց չներկայացվեց առ այն, որ ես հայրենիքի դավաճանություն եմ կատարել և համագործակցել եմ Հայաստանի հատուկ ծառայությունների հետ: Իմ պաշտպանները ամբողջությամբ հերքել են այն բոլոր ոչ համոզիչ ապացույցները, որ ներկայացվել էին [իմ դեմ]», – ասում էր Միրկադիրովը դատարանի շենքի մոտ հավաքված լրագրողներին:
Ադրբեջանի Ազգային անվտանգության ծառայությունը, հիշեցնենք, պնդում էր, թե Միրկադիրովը հավաքագրվել է հայկական հատուկ ծառայությունների կողմից` տեղեկություններ փոխանցելով ռազմական ստորաբաժանումների և ռազմավարական նշանակության օբյեկտների` մասնավորաբար Բաքուն Հեյդար Ալիևի անվան միջազգային օդանավակայանին կապող նորակառույց մայրուղու մասին: Որպես ապացույց մեղադրող կողմը ներկայացնում էր 2009 թվականին Թբիլիսիում արված մի տեսագրություն, որտեղ Միրկադիրովը հանդիպում էր Հայաստանի երկու քաղաքացիների` այդ թվում «Ռեգիոն» կենտրոնի ղեկավար Լաուրա Բաղդասարյանի հետ և նրանցից, մեղադրող կողմի պնդմամբ, որոշակի գումար ստանում: Բացի այդ, ադրբեջանական կողմը պնդում էր, որ Թուրքիայում կազմակերպված համաժողովներից մեկի ընթացքում Միրկադիրովը հանդիպել է 1994-95 թվականներին Հայաստանի Ազգային անվտանգության գլխավոր վարչության պետի պաշտոնը զբաղեցրած Դավիթ Շահնազարյանի հետ:
Կարդացեք նաև
Գեւորգ Ստամբոլցյան
Նյութի մանրամասները կարդացեք «Ազատություն» ռադիոկայանի կայքում
