Հայաստանի երգիծանկարիչների ասոցիացիան ամեն տարի ապրիլի 1-ին ցուցահանդեսով է ներկայանում: Ինչպես Aravot.am-ի հետ զրույցում հայտնեց Հայաստանի երգիծանկարիչների ասոցիացիայի նախագահ Սուքիաս Թորոսյանը (ToTo), այս տարի ցուցահանդեսը նվիրված կլինի ազատ մամուլին եւ կբացվի Ժուռնալիստի տանը:
«Շուրջ 20 երգիծանկարիչներ, որ երբեւէ տպագրվել են, մասնակցելու են ու ցուցադրելու են իրենց գործերը այդ ցուցահանդեսում, որպեսզի հասկանանք, թե ազատ մամուլն ի՞նչ զարգացում կամ հետընթաց է ապրել: Այդ առումով շատ հետաքրքրական է լինելու, երբեմն հիշողությանդ մեջ այնպիսի բաներ են մնում, որ թվում է թե դա անցյալում էր, բայց այսօր էլ շատ արդիական է: Մեր ցուցահանդեսը բացառիկ է լինելու, քանի որ ներգրավված են լինելու բոլոր թերթերը, բնականաբար առաջին թերթերի մեջ «Առավոտն» է եղել, «Ազգը», «Երկիրը» «Ուրարտուն»….Թերթերից որոշները այսօր չեն հրատարակվում: Ինքս 6-7 տարի «Առավոտում» եմ աշխատել»,-նշեց Սուքիաս Թորոսյանը:
Երգիծանկարչի ձեւակերպմամբ, իրենց նպատակն է ցույց տալ երգիծանկարչությունը մամուլում:
Նա ափսոսում է, որ երգիծանկարչությունը ցավոք սրտի Հայաստանում մեռնում է: «Մտածում էի՝ երեւի 3-4 նկարիչ է մնացել, բայց հենց տեղեկացան ձեռնարկի մասին, պարզվեց 20-25 հոգի ցանկանում է ցուցադրել իր արխիվային գործերը: Ուզում եմ հիշեցնել, որ նույնիսկ ամենադժվար տարիներին, երբ պետականություն չենք ունեցել, օրինակ Թուրքիայում տպագրել ենք երգիծական ամսագիր, Լոնդոնում՝ «Ապտակը» կամ «Խաթաբալան»՝ Թիֆլիսում: Թերթերում քաղաքական հոդվածների հետ միշտ «գնում» էր երգիծական հումորը: Ափսոսում եմ, որ այսօր դա ընդհանրապես չկա, եւ երեւի ժամանակն է, որ արթնացնենք»,-կարծում է ToTo-ն:
Կարդացեք նաև
Գոհար ՀԱԿՈԲՅԱՆ
Լուսանկարը՝ humor.am կայքից
