Թրանսփարենսի ինթերնեյշընըլ հակակոռուպցիոն կենտրոնի ղեկավար Վարուժան Հոկտանյանն այսօր Ընտրական օրենսգրքի թեմայով ԱԺ լսումների ժամանակ ասաց, որ ե՛ւ ներկա օրենսգրքում եւ նախագծում կա դրույթ վերաքվեարկություն նշանակելու, քվեարկության արդյունքները չեղարկելու: Բայց թե որ դեպքերում դա պետք է չեղյալ հայտարարվի, որեւէ կոնկրետացում չկա: Ի՞նչ է նախատեսվում, կլինի՞ կոնկրետացում: Մասնավորապես, անճշտությունները հաշվի առնելը կա նախագծում եւ որեւէ ձեւով արդյունավետ դա չի օգտագործվում: Օրինակ, եթե բավականին մեծ անճշտություններ են տեղամասում լինում, գոնե հետաքննություն լինի, թե որտեղից են գալիս այդ անճշտությունները:
Դավիթ Հարությունյանը պատասխանեց, որ կան հարցեր, որ դժվար է ասել՝ 50 անճշտությունների դեպքում պետք է անվավեր ճանաչվեն ընտրատեղամասում արդյունքները, թե՞ 100. «Պետք է գտնենք այնպիսի մեխանիզմ, որը անճշտություն չի առաջացնում: Եթե կոնկրետ առաջարկություն ունենաք՝ կլսենք: Եթե անճշտությունը օբյեկտիվորեն կարող է առաջանալ, վտանգավոր կլինի, որ դրանով ընտրատեղամասում անվավեր ճանաչենք արդյունքները: Պատկերացրեք, 50 անճշտություն ամրագրվի եւ 50 հոգով որոշեն տապալել այդ ընտրատեղամասում արդյունքները: Մտնեն, քվեարկեն եւ քվեաթերթիկը չգցեն, կլինի անճշտություն: Դա վտանգավոր կլինի, երկրով մեկ կարող է չճանաչվեն ընտրությունների արդյունքները»:
Հերիքնազ Տիգրանյանն էլ հարցրեց՝ ինչո՞ւ ՀՀ-ում հավատարմագրված դիվանագիտական առաքելությունները նախագծով զրկվեցին դիտորդ լինելու իրավունքից: Դավիթ Հարությունյանը պատասխանեց, որ դիտորդական առաքելությունից ակնկալվում է, որ պետք է հրապարակեն զեկույց: Իսկ այդ զեկույցը որեւէ երկրի ընտրությունների վերաբերյալ երբեմն բացասական ազդեցություն է ունենում երկկողմ հարաբերությունների վրա:
Հռիփսիմե ՋԵԲԵՋՅԱՆ
== Իսկ այդ զեկույցը որեւէ երկրի ընտրությունների վերաբերյալ ե ր բ ե մ ն բացասական ազդեցություն է ունենում երկկողմ հարաբերությունների վրա:==
Ֆեմիդայի հարգելի քրմապետ, ոչ թե երբեմն, այլ այն դեպքում, երբ ընտրություններ պղծողը հրեշտակ է ձևանում….