Այսօր Մալաթիա-Սեբաստիա վարչական շրջանի Սուրբ Աստվածածին եկեղեցուց հուղարկավորելու տարան մայոր Հայկ Թորոյանին: Նա օրերս զոհվեց ղարաբաղա-ադրբեջանական շփման գծում մարտական գործողությունների ժամանակ` Մատաղիսը պաշտպանելիս:
Նա երեսուն տարեկան էր ու ՀՀ ԶՈՒ-ում ծառայում էր 2002 թվականից:
«Նա շատ նվիրված էր, մինչեւ վերջ նվիրվել էր հայրենիքին, հայրիկին էլ ասել էր՝ հեսա կգամ քո մուրազը կկատարեմ, կամուսնանամ: Հայրը՝ գիտնական, մայրը՝ մանկավարժ, ուներ մի քույր՝ ամուսնացած: Համեստ ընտանիք են»,- պատմեց Հայկի հոր երեսուն տարվա գործընկերը՝ Ազատուհի Խաչատրյանը:
Կարդացեք նաև
Նրա տեղեկություններով, Հայկի ծնողները շատ անհանգստացած էին, պատմում էին, որ երեք օր է՝ չեն կարողանում կապվել Հայկի հետ. «Երբ որ եկել են նախարարությունից, որ ծնողներին հայտնեն Հայկի մահվան լուրը, մայրը անմիջապես հասկացել է, ասել է՝ լռեք, մի ասեք, ոչինչ»:
Արփինե ՍԻՄՈՆՅԱՆ
