«Մի երկրի, որի առաջին դեմքը, ղեկավարը տարիներ առաջ Ռամիլ Սաֆարովին կարող էր զինվորական բարձր կոչում տալ եւ միանվագ վճարել ութ տարվա աշխատավարձը, ազգային հերոս դարձնել գիշերով քնած հայ զինվորին կացնահարելու համար, այդ ազգի բնութագիրն ու նկարագիրն արդեն պարզ է , բոլորի աչքի առջեւ: Հատուկ գնահատականի կամ մեկնաբանության կարիք չկա»,- այս կարծիքին է ԱԺ ՀՀԿ-ական պատգամավոր Հովհաննես Սահակյանը:
Պատգամավորի համոզմամբ, եթե Քյարամ Սլոյանին գլխատողին ու առհասարակ նման հանցագործություններ իրականացնողներին Իլհամ Ալիեւը չպարգեւատրեր, ադրբեջանական բանակում որեւէ մեկը չէր կռվի. «Վայրագ քայլերի համար պարգեւատրումներով, առանձին ֆինանսավորումներով շահագրգռելու տարբեր եղանակներով է, որ փորձում են ինչ-որ քայլեր կատարել: Մենք չէ, որ պետք է գնահատենք, այդ ամենը ամբողջ միջազգային հանրության աչքի առաջ է, եւ միջազգային հանրությունն է, որ պետք է գնահատական տա, որ նույնիսկ պատերազմական իրավիճակներում զինվորներին է, որ խրախուսում է Ադրբեջանի ղեկավարությունը:
Դա վառ ապացույց է այն բացթողումների ու այն խնդիրների, որ օրը ցերեկով միջազգային հանրության առջեւ Ռամիլ Սաֆարովը կացնահարեց Գուրգեն Մարգարյանին ու Եվրոպայի սրտում դատավարությունն անցկացնելուց հետո տեղափոխեցին, տարան Ադրբեջան ու նույն պահին ցինիկաբար ամբողջ միջազգային «արդար» հանրության առջեւ հերոսացրին մարդասպանին: Այդ ամենի հետեւանքն էլ սա պետք է լիներ, թող սպասեն նոր Սաֆարովների ու հրոսակախմբերի բազմացմանը»:
Կարդացեք նաև
Մեր դիտարկմանը, թե կան կարծիքներ, որ եթե Սաֆարովի դեպքում հայկական կողմը չթերանար ու համապատասխան գործողություններ աներ Ադրբեջանին պատասխանատվության ենթարկելու ուղղությամբ, գուցե Քյարամ Սլոյանին գլխատողի պարգեւատրում չլիներ, պարոն Սահակյանը շարունակեց. «Թերացել ենք մի հարցում, պետք է ոչ թե միջազգային հանրության առջեւ հերթական անգամ գնայինք ու ինչ-որ բան ներկայացնեինք, մեկ է, կարծես թե, այսպիսի հարցերում երկակի չափանիշը դարձել է գործելաոճ միջազգային հանրության համար, այլ Ռամիլ Սաֆարովին պետք է սատկացնեին, թեկուզ Ադրբեջանում, որ հասկանային, որ մենք չենք թերացել, թե չէ մյուս բոլոր գործողությունները անիմաստ են, անկախ նրանից թերացել ենք, թե չենք թերացել»:
Արփինե ՍԻՄՈՆՅԱՆ
